Kryetari i SBASHK-ut në Kamenicë, Nazim Jakupi, thotë se sot me 2 shtator në ditën e parë të shkollës në qytet nuk është zbatuar vendimi i kryetarit të Komunës, Qëndron Kastrati, për reformat në shkolla, njofton Klan Kosova.

Me këtë vendim nxënësit e gjashtë shkollave të kësaj komune do të vijonin mësimet në fshatra të tjera, por kjo nuk u zbatua.

Prindërit nuk i kanë lejuar fëmijët e tyre të nisin vitin shkollor në shkollat e përcaktuara nga komuna me arsyetimin që është e palogjikshme që përderisa i kanë shkollat në fshatrat e tyre të transferohen diku tjetër.

Kundërshtime rreth këtij vendimi pati edhe drejtori i shkollës së fshatit Busavatë i cili iu bashkua protestës së prindërve para shkollës.

Ndërkaq gjatë ditës SBASHK ka mbajtur një mbledhje me përfaqësuesit e tyre në shkolla përfshirë edhe në ato ku do të bëheshin reformat prej ku paralajmëruan se nëse pengohen nga komuna të mbajnë procesin mësimorë në shkollat e deritashme do të fillojnë fillimisht me 2 orë grevë e më pas nga java e ardhshme grevë e përgjithshme e cila do të përkrahet edhe nga niveli qendrorë.

Nga Komuna e Kamenicës deklaruan se nuk do të tërhiqen nga vendimi i tyre pavarësisht nga refuzimi i prindërve e stafeve shkollore, sipas tyre zhvillimi i procesit mësimorë do të jetë i pamundur me që aty nuk janë dërguar as materialet bazike.