Një vit qeverisje e Përparim Ramës, VV në Prishtinë del me një aktivitet plot kritika

Meqë janë bërë një vit prej kur Përparim Rama ka marrë pozitën e kryetarit të Prishtinës, Lëvizja Vetëvendosje sot ka mbajtur aktivitetin me moton “Prishtina e Përjetimeve” në sheshin Nënë Tereza në kryeqytet, raporton arbresh.info.

Mes kritikash për Ramën, asamblisti i VV-së në kryeqytet, Gëzim Sveçla, ka thënë para mediave se për një vit qeverisje, jeta e qytetarëve është vështirësuar dhe sot ka më shumë mbeturina, më shumë rrezik nga qentë endacak dhe kolona të mëdha e të gjata.

“Për një vit qeverisje të tyre nuk ka dyshim se jeta e qytetarit të Prishtinës është bërë më e rëndë, më e vështirë dhe më pak kualitative.

Sot ka më shumë mbeturina, më shumë rrezik nga qentë endacak, më shumë tollovi, kolona më të gjata, me shumë pritje e vonesa, parking më të shtrenjtë, taksi me çmim më të lartë, më shumë gropa në rrugë, më pak gjelbërim, ndriçim, e kështu me radhë. Janë këto dukuri që drejtpërdrejtë ndikojnë në përditshmërinë dhe mirëqenien e qytetarëve të Prishtinës dhe e cila, fatkeqësisht, asnjëherë nuk ka qenë më e zymtë dhe më boshe se tani.”, theksoi Sveçla.

Ndërkaq, asamblistja e Listës Guxo, Triera Kasumi-Berisha, tha se kryetari Rama me koalicionin e tij po e transformon Prishtinën për së keqi.

Ajo uroi që në tre vitet tjera e mbetura në komunë, punët që Rama i ka bërë për një vit, mos t’i vazhdojë më, sepse sipas saj, Prishtina i ka keq punët.

“Koha po kalon e transformimi i Prishtinës nuk po ndodh. Në fakt ai po ndodh për së keqi. Kaloi një vit, e shpresoj që vitet e mbetura të mandatit të kryetarit Rama të mos ngjajnë as për së afërmi me me këtë vit, se po që se ndodh kështu, Prishtina keq i ka punët”, tha Kasumi-Berisha në këtë aktivitet.

Ndër të tjera, ata treguan edhe disa nga punët që VV-Guxo i kanë bërë si grupi më i madh i asamblistëvve në Kuvendin Komunal të Prishtinës./arbresh.info