Sot bëhet një vit që kur ka vdekur ish-sekretarja amerikane e Shtetit, Madeleine Albright.

Kryetari i Partisë Demokratike të Kosovës, Memli Krasniqi përmes një shkrimi në Facebook, e ka kujtuar atë në një vjetorin e vdekjes së saj.

Krasniqi tha se emri i saj ka hyrë përgjithmonë në histori me kontributin e saj të shquar.

“Emri i zonjës Albright ka hyrë përgjithmonë në histori, me kontributin e saj të shquar si ish-Sekretare e Shtetit të Shteteve të Bashkuara të Amerikës, duke mbështetur Kosovën në periudhën e luftës dhe ndaljen e gjenocidit serb në vendin tonë”, tha Krasniqi.

Tutje Krasniqi ka shkruar se ajo ishte një diplomate e shkëlqyer, avokuese e të drejtave të njeriut dhe promotore e demokracisë në botë.

“Diplomate e shkëlqyer, avokuese e të drejtave të njeriut dhe promotore e demokracisë në botë. Të tillë do ta kujtojmë përherë Madeleine Albright. Nderimet më të thella për jetën dhe veprën e saj”, ka shkruar ai.

Albright vizitoi Kosovën në korrik të vitit 1999, një muaj pas përfundimit të luftës.

“Duke u ngritur kundër [ish-liderit serb, Sllobodan]Millosheviqit, i kemi ulur gjasat për një vullnet të ri të Millosheviqit. Duke ndërtuar paqen në Kosovë, ne do të ndihmojmë në stabilizimin e Ballkanit dhe në këtë mënyrë do të kontribuojmë në një Evropë të tërë dhe të lirë”, ka thënë atëbotë Albright.

Për kontributin e saj për çlirimin e Kosovës, më 2019, në përvjetorin e 20-të të hyrjes së trupave të NATO-s, në Prishtinë u zbulua busti për nder të saj.

Po në vitin 2019, Kosova e kishte dekoruar ish-sekretaren Albright me Urdhrin e Lirisë.

Gjatë fjalimit në Prishtinë, më 12 qershor të vitit 2019, Albright deklaroi se vendimi për të ndërhyrë në Kosovë “ishte i drejtë”.

​“Aleanca jonë ishte e bashkuar dhe e fortë dhe më e rëndësishmja është se ia dolëm për arsye se kauza e jonë ishte e drejtë dhe për arsye të qytetarëve të Kosovës përtej të gjitha pyetjeve, praktikave dhe politikave”, ishte shprehur ish-sekretarja Albright.

Madeleine Albright vdiq në moshën 84 vjeqare nga sëmundja e kancerit./arbresh.info/