Kryetari i LDK-së, Isa Mustafa, tha se kërkon nga subjektet politike bashkëpunim për gjetjen e një zgjidhje për postin Presidentit dhe sipas tij, kjo çështje nuk duhet ta çojë vendin në zgjedhje.

Mustafa ka thënë se për postin e presidentit është diskutuar edhe para shkuarjes së Thaçit në Hagë.

“Kemi diskutuar edhe para shkuarjes në Hagë të presidentit Thaçi dhe kryetarit të PDK-së Veseli. Kemi bërë përpjekje që të gjejmë një zgjidhje e cila kishte me qenë zgjidhje me një përfshirje të gjerë të komunikimit dhe diskutimit lidhur me pozitën e ardhshme të presidentit në mënyrë që të mos jetë shkas i shkuarjes në zgjedhje të reja”, tha Mustafa për RTV21.

“Ne kemi komunikuar por nuk jemi ulur të komunikojmë drejtpërsëdrejti sepse kemi vlerësuar që edhe PDK-së i nevojitet një periudhë që të merret me çështje e tyre sepse nuk është lehtë që kryetari të shkojë në Hagë dhe sigurisht atyre iu nevojitet kohë e konsolidimit”, tha ai.

I pyetur nëse ai do të jetë kandidati i LDK-së për President, tha se në subjektin e tij politik nuk është biseduar për postin e të parit të shtetit.

“… Të kemi në kandidat të pavarur për President të vendit. Ta gjejmë një figurë që merr përkrahjen e shumicës së partive politike”, tha ai.

Mustafa ndër të tjera ka folur edhe për Gjykatës Speciale, dialogun me Serbinë, dhe mundësinë për zgjerimin e koalicionit qeverisës.