Murati: Sot u ekzekutua mbështetja për punëdhënësit që rritën pagat e 17 mijë punëtorëve në sektorin privat

21:47 | 16 Mars 2023
E.H

Ministri i Financave, Hekuran Murati, ka njoftuar se sot është ekzekutuar mbështetja për punëdhënësit privat që kanë rritur pagat e 17 mijë punëtorëve.

Murati, me anë të një postimi në Facebook, tha se me kompletimin e kësaj mase, është shënuar edhe kompletimi i të gjitha masave të Pakos për Përballje me inflacionin.

“Inflacioni ka rënduar buxhetet e familjeve gjithandej, mirëpo asnjë qeveri e rajonit nuk ka pasur një pako kaq të madhe e kaq gjithëpërfshirëse si Pakoja për Përballje me Inflacionin që ka zbatuar qeveria jonë”, është shprehur Murati.

Tutje, ai ka bërë të ditur se nga Pakoja për Përballje me Inflacionin kanë përfituar mbi 284 mijë pensionistë, mbi 24 mijë familje në asistencë sociale, mbi 75 mijë zyrtarë publikë, afro 209 mijë qytetarë kanë përfituar mbështetje për kursimin e energjisë, mbi 66 mijë studentë e afro 13 mijë punëtorë të ndërmarrjeve publike./arbresh.info

Shpërndaje në rrjete sociale

Lajmet më të lexuara

Të ngjashme

Foto lajm