07:21 | 29 Janar 2022
Trina Galanxhi
Sot pritet të mbajë mot i ftohtë mbi vendin tonë, njofton Prishtina Weather. Paradite vende-vende me mundësi për reshje të dobëta bore.
Mot i ndryshueshëm në fundjavë, me vransira, borë e kthjellime. Të shtunën më ftohtë. Shkurti fillon me mot të ftohtë dhe me të reshura bore, herë herë edhe intenzive.
28.01.2022 – Mot i ndryshueshëm po parashihet ditëve të fundjavës në vendin tonë. E shtuna fillon me mot të ftohtë, vransira dhe lokalisht me reshje të dobëta bore, e ditën vransirat fillojnë të shpërndahen. Ditën e diel, pas mëngjesit me ngrica, pasdite kalimi i një sistemi frontal sjell sërish vransira e mundësi për reshje të dobëta bore apo edhe shiu.
Të hënën vransirat fillojnë të shtohen e në mbrëmje priten së pari të reshura shiu, që më pas nga e marta me rënie të temperaturave shndërrohen në borë. Vende-vende reshjet e borës mund të jenë më intenzive që formojnë edhe një shtresë të konsiderueshme bore.
Indeksi i cilësisë së ajrit edhe në ditët e fundjavës mbet më gjatë në vlera të dobëta dhe shumë të dobëta, shkaku i kushteve jo shumë të favorshme atmosferike. Ditën e shtunë, meqenëse parashihet të ketë qarkullim më të mirë ajror, gjatë ditës ndotësit ajror do jenë më të shpërndarë, e indeksi mund të zbres edhe në vlera të pranueshme dhe të mira.
29.01 – Më ftohtë. Paradite vende-vende me mundësi për reshje të dobëta bore. Gjatë ditës priten kthjellime.
30.01 – Vransira të ndryshueshme dhe intervale me diell. Përreth viseve malore mundësi për reshje të dobëta bore, apo edhe shiu në pjesë më të ulëta.
31.01 – Fillimisht kryesisht kthjellët dhe me diell. Ditën vransirat shtohen, e më vonë në mbrëmje fillojnë edhe reshjet e shiut, që më pas shndërrohen edhe në borë.
1.02 – Ftohtë, kryesisht vranët dhe me borë. Vende-vende reshjet edhe mund të jenë më intenzive. Deri në mbrëmje reshjet pushojnë.
2.02 – Ftohtë e kryesisht me vransira. Në mbrëmje vende-vende mundësi për fjolla bore.
Temperaturat mjaft të ndryshueshme në ditët vijuese, minimalet zbresin në -1C e -7C, ndërsa maksimalet pas një rënie të shtunën në 1C, nga dita e diel rriten në 4C e 5C, për të pësuar rënie ditën e martë edhe në 1C.
Era do të fryjë kryesisht nga krahu verior, të shunën edhe mesatare 5-10m/s, e ditën e hënë e lehtë nga juglindja 1-5m/s.
Shtypja atmosferike mbetet lartë mbi vlera normale, me tendencë të rënies më të thellë në fillim të javës së ardhshme./prishtina weather/
Skip to content
