Kryetari i Partisë Socialdemokrate Dardan Molliqaj ka mbajtur konferencë për medie në lidhje me disa çështje dhe informata shqetësuese për krizën energjetike në vend, raporton Ekonomia Online.

Ai ka treguar çështjet që sipas tij Qeveria është duke manipuluar. Në një konferencë për medie, Molliqaj ka thënë se rënia e bllokut A3 dhe A5 është bërë qëllimshëm, vetëm për ta dëmtuar reputacionin e KEK-ut, e që sipas tij, ky bashkëpunim ishte me menaxhmentin e ri të KEK-ut dhe me Qeverinë e Kosovës.Molliqaj në një konferencë për media ka deklaruar se ka dyshime që kjo prishje është shkaktuar nga KEDS-i.

“Në bazë të burimeve tona brena KEK-ut janë duke u zhvilluar tri problematika të theksuara që e rëndojnë edhe më tutje sistemin e energjisë në Kosovë. E para tashmë ka ndodhur. Sipas burimeve tona 10 ditë më parë ka pasur rënie të Bllokut A3 dhe A5, kishte mungesë të shtuar të energjisë elektrike. Sipas asaj që ne kemi informacione dhe që kërkojmë hetim të organeve përgjegjëse dhe të ekspertëve të fushave, rënia e Bllokut A3 dhe A5 brenda ditës duket që ka qenë e qëllimshme dhe e shkaktuar nga KEDS-i”, ka thënë ai.

Më tutje, Molliqaj tha se dyshojnë që KEDS-i këtë veprim e ka bërë në bashkëpunim me menaxhmentin e ri të KEK-ut dhe Qeverinë e Kosovës.Kjo, sipas tij, ka ndodhur me qëllim të dëmtimit të reputacionit të KEK-ut.

“Në mungesë të shkarkimit të rrymës dhe kthimit të rrymës nga KEDS drejt termo-elektranës A3 dhe A5 ka ndodhur dëmtimi i qëllimshëm i saj. Ne dyshojmë që nëse vërtetohet se ka qenë një veprim i tillë në bazë të asaj që ne kemi informatë është lehtë e vërtetueshme nëse do të ketë hetime, kjo i bie që ka pasur qëllim KEDS-i në bashkëpunim edhe me Qeverinë dhe me menaxhmentin e ri, të dëmtojë reputacionin e kompanisë publike KEK, dhe të thotë se mungesa e energjisë është e shkaktuar nga mungesa e prodhimit dhe problemeve në KEK”, deklaroi ai.

Molliqaj ka përmendur edhe dhënien e pushimit për 10 inxhinierë të prodhimit në KEK pas kësaj ngjarje.“Zhvillim tjetër negative në ‘Kosovën A’ është që për herë të parë menaxhmenti ka vendosur pushim të detyruar të mbi 10 inxhinierëve kryesorë të prodhimit pas kësaj ngjarje. Nëse menaxhmenti është duke bërë hetime ne duam që të informohemi si qytetarë të Kosovës, por nëse ky pushim i detyruar që nuk ka ndodhur asnjëherë në këtë institucion, është për të eliminuar, kontrolluar apo sabotuar ndërmarrjen publike, kërkojmë llogari dhe shpjegime të menjëhershme nga KEK-u”, u shpreh ai.

Alarmante ai e ka konsideruar edhe mos renovimin e kontratave për materialet shpenzuese në KEK.Ai tha se nga ardhja në Qeverie kryeministrit Albin Kurti, asnjë kontratë nuk është rinovuar.

“Ajo çfarë është alarmante në pragun e rrezikut të ri, që nga shkurti kur është themeluar Qeveria Kurti II, asnjë kontratë për materialet shpenzuese në KEK nuk është rinovuar. Ka katër ditë që në Bllokun A ka mungesë të acidit. Një element i domosdoshëm dhe tejet i rëndësishëm për vazhidmin e punës në këtë kompani”, ka thënë ai.