Ministria e Arsimit, Shkencës, Teknologjisë dhe Inovacionit ka  dhënë detaje lidhur me vitin e ri shkollor 2023/2024, që nisi sot.

MAShTI ka bërë të ditur se në bazë të informatave të pranuara nga komunat, gjatë ditës së sotme, procesi edukativo-arsimor ka filluar në 658 institucione, ashtu siç është përcaktuar me Udhëzimin Administrativ.

Po ashtu thuhet se në 18 institucione arsimore nuk kanë filluar ende për shkaqe të procesit të renovimit, duke shtuar se në këto shkolla të cilat ende nuk kanë filluar mësimin më 4 shtator pritet të përfundojnë punimet, shkruan Arbresh.info.

“Në bazë të informatave të pranuara nga komunat, gjatë ditës së sotme, procesi edukativo-arsimor ka filluar në 658 institucione, ashtu siç është përcaktuar me Udhëzimin Administrativ për Kalendarin e vitit Shkollor 2023-2024. Sipas raportimeve të komunave, procesi mësimor nuk ka filluar në tetëmbëdhjetë (18) institucione arsimore të cilat kanë qenë në proces të renovimit. Në shumicën prej këtyre institucioneve punimet do të përfundojnë deri më 4 shtator dhe do të nis procesi i rregullt mësimor.”

Përveç kësaj, MAShT-i ka shkruar edhe rreth pagesës për furnizim me tekste shkollore, duke thënë se për të gjithë ata që kanë aplikuar deri më 29 gusht në ora 16:00, ekzekutimi i mjeteve ka përfunduar të enjten.

“Fillimisht janë ekzekutuar 30 euro për materiale mësimore e më pas 50 euro për tekste shkollore.  Ndërsa, nga sot ka vazhduar ekzekutimi i mjeteve për ata që kanë aplikuar pas datës 29 gusht. Sikurse kemi njoftuar edhe më herët, aplikimi do të jetë i hapur gjatë gjithë muajit shtator në mënyrë që të sigurohemi që asnjë nxënës për çfarëdo arsye të mos mbetet pa tekste shkollore.  Çdo rast i adresuar do të trajtohet me prioritet dhe do të ofrohet ndihma e nevojshme për aplikim dhe përfitim të këtyre mjeteve.”/Arbresh.info/