Kryetari i Gjilanit, Lutfi Haziri, është zgjedhur anëtar Parlamentit Global të Kryetarëve tëKomunave, me seli në Hagë, duke u bërë kryetari I parë I ndonjë komune nga rajoni që përfaqësohet në këtë institucion.

Kjo është bërë e ditur përmes një komunikate për media, ku thuhet se në letrën e mirëseardhjes si anëtar i Parlamentit Global të Kryetarëve të Komunave drejtuar Lutfi Hazirit, nga Kryetarja e Komitetit Ekzekutiv të Parlamentit, Patricia de Lile, është shprehur mirëseardhje Kryetarit të Gjilanit, Lutfi Haziri.

“Në letrën e mirëseardhjes si anëtar i Parlamentit Global të Kryetarëve të Komunave drejtuar Lutfi Hazirit nga Patricia de Lile, kryetare e Komitetit Ekzekutiv të Parlamentit dhe njëherësh Kryetare e Cape Toën, thuhet se “me kënaqësinë me të madhe ju mirëpresim juve z. Haziri në Parlamentin Global të Kryetarëve të Komunave si dhe kemi nderin e veçantë t’ju kemi mysafir në Samitin Vjetor të Parlamentit që do të mbahet në Bristol të Britanisë në tetor 2018”.

Tutje në letrën e znj. de Lile thuhet se “puna dhe zëri i z. Haziri në kuadër të GPM do të jetë esencial në zhvillimin e mëtutjeshëm të marrëdhënieve në mes qyteteve e komunave ndërkombëtarisht në përgjithësi, por edhe në mes rajonit të Ballkanit dhe GPM, në veçanti”.

Kreu i Gjilanit, Lutfi Haziri, pasi ka pranuar letrën e znj. de Lile, ka thënë se ndjehet i nderuar që i është dhënë kjo mundësi për të qenë anëtar i Parlamentit Global të Kryetarëve të Komunave dhe se ky është një privilegj dhe mirënjohje e veçantë që i bëhet edhe Gjilanit dhe Kosovës.

“Sikur që kam qenë i përkushtuar në përfaqësim dinjitoz të Gjilanit e Kosovës në organizma tjerë relevantë europianë, si në ALDA për shembull, edhe në Parlamentin Global të Kryetarëve të Komunave, do të jap kontributin tim për të mirën e qytetarëve jo vetëm të komunës sonë, por të të gjithë rajonit. Përtej nderit, kjo pozitë më jep edhe një përgjegjësi shtesë, që me gatishmërinë me të madhe, do e kryej me përkushtim” ka thënë Haziri.

Përndryshe, Parlamenti Global i Kryetarëve të Komunave mbledh në vete kryetarë komunash nga të pesë kontinentet që për mision ka ofrimin dhe shkëmbimin e përvojave dhe lidershipit të kryetarëve të komunave në lidhje me ballafaqimin dhe zgjidhjen e sfidave të qeverisjes lokale që ndërlidhen edhe me sfidat globale.

Në të njejtën kohë, Parlamenti Global i Kryetarëve të Komunave përcjellë njohuritë e veçanta të liderëve të qyteteve e komunave nga e mbarë bota tek debatet strategjike për zhvillim ndërkombëtar, duke vlerësuar lartë nevojën për zgjidhje praktike të problemeve dhe sfidave me të cilat ballafaqohen njerëzit, thuhet më tej në komunikatë./arbresh.info/