Zëdhënësja e Lidhjes Demokratike të Kosovës, Sibel Halimi ka reaguar pasi kryeministrit i vendit Albin Kurti tha se e pranon propozimin franko-gjerman për normalizimin e marrëdhënieve ndërmjet Kosovës dhe Serbisë.

Me anë të një postimi në Facebook, Halimi tha se Kosova është shtet parlamentar dhe sipas saj Kurti e ka obligim të raportojë në Kuvend për dialogun.

“Transparenca nuk do të duhej të mbetet peng i vullnetit të partisë në pushtet, është e detyrueshme dhe obligative që Kryeministri të raportojë në Kuvend, para të zgjedhurve të popullit, duke qenë se Kosova është shtet parlamentar”, shkroi Halimi.

Ajo shtoi se deklarata e Kurtit që propozimi franko-gjerman është pranuar nga ana e tij tregon për një qasje personale ndaj dialogut.

“Ndaj, deklarata e Kryeministrit që propozimi Franko – Gjerman është pranuar nga ana e tij tregon për një qasje personale e jo agjendë shtetërore, prandaj Qeveria është mbyllur hermetikisht për publikun dhe për pasojë po shkakton mosbesim e mëdyshje”, deklaroi tutje Halimi.

Kujtojmë se sot Kurti pas takimit me të Dërguarin e Posaçëm të BE-së për dialogun Kosovë-Serbi, ka thënë se Kosova e pranon propozimin e BE-së për normalizimin e marrëdhënieve mes Kosovës dhe Serbisë.

“Shkëmbim i mirë me të dërguarin special të BE-së Miroslav Lajçak gjatë një drekë pune në Prishtinë. Ne e pranojmë propozimin e BE-së për normalizimin e marrëdhënieve ndërmjet Kosovës dhe Serbisë dhe e konsiderojmë atë një bazë të mirë për diskutime të mëtejshme dhe një platformë solide për të ecur përpara”, ka shkruar Kurti në Twitter./arbresh.info.

Lexo edhe:

Lajçak për Asociacionin: Gjithçka që është nënshkruar, duhet të zbatohet