Partia në pushtet, Lëvizja Vetëvendosje, pak minuta më parë, përmes një videoje akuzoi LDK-në se nuk ofroi asgjë për të kapërcyer situatën e rënduar ekonomike të vendit gjatë këtyre dy viteve të Qeverisë Kurti.

E ndaj kësaj videoje, ka reaguar menjëherë LDK-ja, duke e quajtur këtë parti si “Lëvizje Video-Vendosëse”.

Jehona Lushaku-Sadriu, kryetarja e Forumit të Gruas të LDK-së, përmes një postimi në Facebook, ka thënë se VV-ja është parti populsite dhe e paaftë, si dhe të dëmshme për Kosovën.

“Shtëpia propaganduese LVV paska vazhduar me sulme ndaj lidershipit të LDK-së duke fabrikuar dobët. Ju jeni veç populista të paaftë, e të dëmshëm për Kosovën. Këtë po e vuajnë qytetarët, s’kanë nevojë për video nga ju. Videot s’hahen”, thotë Lushaku-Sadriu në reagim.

“Kujtojeni që jeni rritë me gënjeshtra: Shtetin e Kosovës nuk e keni pranuar e as njohur; Flamurin e Kosovës e keni quajtur ‘flamur lara lara’; Ja keni vënë flakën Kuvendit për marrëveshje të cilat sot jeni bërë gardian të tyre; Demarkacionin s’e përmendët dje në vizitë; Negocioni me Serbinë natë e ditë pa transparencë. S’po flas asgjë për kontratat njëburimore, nepotizmin, shkeljet e Kushtetutës nga ministrat, inflacionin që e ulni rrejshëm, vendimet joligjore- dënimet që paguhen me taksat tona për keqqeverisjen e ministrive, glorifikimin e kriminelëve të luftës nga Kurti, e AFERAT milionëshe të Ambasadorit me para të Beogradit, që s’keni guxim as me emër t’i drejtoheni: Martinit, pra”, shkroi kryetarja e Forumit të Gruas të LDK-së.

“Kjo është qeverisja juaj! Me 51% s’dini me qeverisë. Mashtrues”, përfundoi ajo.

Reagim pati edhe nga deputeti i LDK-së, Avdullah Hoti, i cili tha se ka pritur se “është ndonjë video që tregon sa kanë qenë investimet e jashtme, sa vende pune janë krijuar, sa është zvogëluar importi i mallrave nga Serbia, sa ka qenë rritja ekonomike, sa është reduktuar inflacioni nga politikat e Qeverisë?!”.

“Por, JO! Ishte video për të vetmen gjë që dinë ta bëjnë — propagandë për mashtrim të publikut”, tha Hoti./arbresh.info/

Lexo edhe:

LVV me video të re: Ekonomia e LDK-së në shërbim të grupeve të interesit