I dërguari i Bashkimit Evropian për dialogun, Miroslav Lajçak  ishte për vizitë në Kosovë të mërkurën mbrëma, gjersa është intensifikuar dialogu Kosovë-Serbi, në përpjekje për arritjen e një marrëveshjeje.

Përmes një postimi në Twitter, Lajçak pas takimit me kryeministrin Albin Kurti dhe zëvendëskryeministrin Besnik Bislimi ka thënë se kanë biseduar për hapat e mëtejmë në dialog.

Lajçak njoftoi se kanë rënë dakord se të gjitha marrëveshjet e kaluara që janë arritur në kuadër të dialogut duhet të zbatohen plotësisht.

“U ktheva sot në Kosovë për të vazhduar diskutimet e mia të sinqerta, të hapura dhe intensive me Kryeministrin Albin Kurti dhe zëvendëskryeministrin Besnik Bislimi për hapat e ardhshëm dhe rrugën përpara për normalizimin e marrëdhënieve me Serbinë. Ne gjithashtu ramë dakord që të gjitha marrëveshjet e kaluara nga dialogu duhet të zbatohen plotësisht”, shkruan Lajçak.

Ndryshe, marrëveshja për Asociacionin e Komunave me Shumicë serbe është në ndër marrëveshjet që janë arritur në kuadër të dialogut në Bruksel.

Edhe zëdhënësi i Departamentit të Shtetit Amerikan, Ned Price, sërish ka folur për çështjen e asociacionit dhe dialogun Kosovë-Serbi.

Price tha se SHBA-ja dhe BE-ja presin që palët “të përmbushin përgjegjësitë e tyre”.

“Kosova dhe Serbia në këtë rast duhet të zbatojnë marrëveshjet që tashmë kanë nënshkruar përmes këtij procesi të dialogut”, tha ai./arbresh.info/

Back in Kosovo today to continue my frank, open and intense discussions with PM @albinkurti and DPM @BislimiBesnik on next steps and the way forward on normalisation of relations with Serbia. We also agreed that all past Dialogue Agreements must be fully implemented. pic.twitter.com/zURabtdEmF

— Miroslav Lajčák (@MiroslavLajcak) January 25, 2023