Gjatë ditës së zgjedhjeve, me 11 qershor pritet të mbaj mot kryesisht i ngrohtë.

Kështu ka bërë të ditur për indeksonline eksperti dhe profesori i meteorologjisë në Universitetin e Prishtinës, Sylë Tahirsylaj, i cili ka treguar se temperaturat gjatë javës së ardhshme pritet të jenë mjaftë të larta, duke arritur kështu deri në 30 gradë celsius.

Sa i përket ditës së diel, kur edhe do të mbahen zgjedhjet, sipas tij do të jetë një mot i pranueshëm për qytetarët megjithëse ka mundësi për reshje lokale të shiut.

“Nga dita e diell e javës së ardhshme deri të hënën do të destabilizohet pak moti, ku do të ketë reshje të dobëta të shiut, por temperaturat do të jenë përsëri të larta. Do të ketë erë nga ana e veri-lindjes me shpejtësi deri në 5-6 metra në sekondë. Pra do të jetë një mot i mirë, i pranueshëm si për florën e faunën, por edhe për turizmin malor e detar. Por edhe për të dal qytetarët në votime, do të ketë mot të pranueshëm dhe nuk do të ketë asnjë pengesë”, ka thënë Tahirsylaj.

Sipas Tahirsylajt që nga e hëna e javës së ardhshme do të ndërpriten reshjet e mëdha të shiut, duke bërë kështu që temperaturat të ngritën dhe të mbizotërojë një mot mjaft i nxehtë mbi vendin tonë.

“Nga kjo e hënë, moti do të jetë nën ndikimin e masave ajrore që do të vinë nga pjesa veri-lindore e rajonit ku në ditën e hënë do të ndërpriten reshjet për të vazhduar deri në kah fundi i javës moti do të jetë i nxehtë dhe nuk do të ketë reshje, në përjashtim të ditës së mërkurë që mund të ketë pak reshje në vendet kodrinore-malore. Temperaturat minimale do të luhaten prej plus 15 gradë celsius, ndërsa ato maksimale pritet të shkojnë deri në plus 30 gradë celsius në rrafshin e Dukagjinit, ndërsa në rrafshin e Kosovës dhe në anën e Anamoravës deri në plus 28-29 gradë celsius. Fusha e shtypjes atmosferike është e lartë në konditat normale të kushteve meteorologjike, prandaj deri në ditën e shtunë do të mbizotëroj mot me diell”, ka shtuar ai.