Kryeministri i Republikës së Kosovës, Albin Kurti, mori pjesë në takimin në përmbyllje të mandatit të këshilltarëve të Këshillit Ndërministror të Ujërave.

Sipas njoftimit, aty u diskutua për arritjet dhe sfidat që mbetën të trajtohen në vijim, shkruan Arbresh.info.

Kryeministri Kurti theksoi nevojën dhe rëndësinë e menaxhimit të qëndrueshëm të burimeve ujore.

“Me marrjen e detyrës filluam menjëherë t’i kthejmë propozimet tona në veprim. Angazhimi ynë për të përmirësuar kuadrin e sektorit të ujit ishte evident kur mbështetëm vazhdimësinë e Këshillit Ndërministror të Ujit më 4 Mars 2020. Kjo nismë mori rëndësi të mëtejshme gjatë pandemisë COVID-19, duke theksuar rolin kritik të menaxhimit të ujit në shëndetin publik dhe sigurinë”, tha kryeministri Kurti, duke theksuar se çdo hap që kemi ndërmarrë përputhet ngushtë me ato diskutime fillestare, duke siguruar që rruga jonë të mbetet e vërtetë ndaj vizionit që kemi parashtruar përpara marrjes së detyrës.

Para të pranishmëve, ai ka përmendur veprimet e ndërmarra në disa fusha, duke thënë se jemi në prag të finalizimit të një ligji transformues për menaxhimin e resurseve ujore; monitorimin e fuqishëm dhe përmirësimin e infrastrukturës; hapat e ndërmarrë në planifikimin strategjik.

“Tani jemi duke miratuar në mënyrë aktive Planet e Menaxhimit të Pellgjeve Lumore për Drinin e Bardhë të përkrahur nga SIDA Suedeze, dhe për tri pellgjet tjera – Ibër, Lepenc dhe Morava e Binçës të mbështetur nga Zyra Zvicerane për Bashkëpunim. Për më tepër, kemi zhvilluar një strategji koncize dhe të zbatueshme për ujin për periudhën 2023-2027, duke siguruar që menaxhimi ynë i ujit të përputhet me nevojat shtetërore dhe standardet ndërkombëtare”, shtoi ai.

Sa i përket zhvillimit të digave, kryeministri tha se progres i dukshëm përfshin digat e Kamenicës dhe Firajës. Kjo e fundit është thelbësore në sigurimin e ujit për Kosovën Juglindore, duke përfshirë rajonet e Gjilanit, Ferizajt, por edhe të Prishtinës.

“Studimet e fizibilitetit janë përfunduar po ashtu edhe për digat e Pollatës, Dragaqinës dhe Kuçicës, dhe pikërisht sot në një ngjarje paralele po starton projekti i hartimit të Master Planit të Digave për Kosovën, i cili do të ofrojë një plan gjithëpërfshirës për zhvillimin e ardhshëm të resurseve ujore”, theksoi kryeministri.

Më tej, kryeministri tha se ndihet i lumtur që gjithashtu po mbështesim zhvillimin e resurseve të reja njerëzore në sektorin e ujit, të demonstruar nga hapja e sektorit për profesionistë e rinj dhe nisjen e një programi master në menaxhimin e integruar të resurseve ujore nga tetori 2023, me mbështetjen e Qeverisë Zvicerane sërish.

Ai shprehu mirënjohjen e thellë për qeverinë zvicerane dhe partnerët e tjerë ndërkombëtarë, mbështetja e të cilëve ka qenë e domosdoshme. “Arritjet që ne festojmë sot, janë një dëshmi e përpjekjeve tona të përbashkëta gjatë dy dekadave e gjysmë të fundit. Falënderoj veçanërisht këshilltarët tanë të deleguar, ekspertiza dhe përpjekjet e palodhshme të të cilëve kanë qenë thelbësore në përparimin tonë. Kontributet e tyre janë të paçmueshme dhe ne jemi thellësisht mirënjohës për përkushtimin e tyre”, tha kryeministri Kurti.

Pas fjalës së kryeministrit Kurti, nga këshilltarët e Këshillit Ndërministror të Ujërave u prezantua gjendja e sektorit, sfidat dhe propozimet për të vazhduar më pas me prezantimin nga ministrat pjesëmarrës, për reformat për zhvillim të sektorit të ujërave.

Në këtë tryezë të pranishëm ishin edhe ministrat Artane Rizvanolli e Liburn Aliu, zëvendësministrat Getoar Mjeku e Agon Dobruna, përfaqësues nga Zyra Zvicerane për Bashkëpunim, si dhe përfaqësues të kompanive rajonale të Ujësjellësit.

Fjala e plotë e kryeministrit Kurti:

E nderuara znj. Artane Rizvanolli, ministre e Ekonomisë,

I nderuari z. Liburn Aliu, ministër i Mjedisit, Planifikimit Hapësinor dhe Infrastrukturës,

I nderuari Laurent Torche, zëvendësdrejtor i Zyrës Zvicerane për Bashkëpunim,

Të nderuar zëvendësministra, Getoar Mjeku, në Ministrinë e Ekonomisë dhe Agon Dobruna në Ministrinë Financave, Punës dhe Transferve,

I nderuari z. Afrim Lajçi, këshilltar për çështje rregullatore të ujërave,

I nderuari z. Baton Begolli, këshilltar për politika ujore,

Të nderuar anëtarë të bordeve dhe kryeshef ekzekutiv të kompanive rajonale të Ujësjellësit,

Të nderuar të pranishëm,

Zonja dhe zotërinj,

Ju drejtohem sot me kënaqësi në lidhje me kujdestarinë tonë të sektorit të ujit – një aset jetik për qëndrueshmërinë dhe prosperitetin e popullit e të shtetit tonë.

Qysh gjatë kohës sa ishim në opozitë, ne e kuptuam nevojën kritike për menaxhim të qëndrueshëm të burimeve ujore. Kjo u ilustrua në tryezën e diskutimit, para 5 vjetëve, të 27 marsit 2019, ku u mblodhëm me të gjithë hisedarët për të diskutuar mbi këtë çështje urgjente. Vështrimet e marra nga ajo ngjarje formësuan ndjeshëm drejtimin tonë të politikave. Ky rast shënoi ndërveprimin tonë të parë zyrtar me këshilltarët e Këshillit Ndërministror të Ujit, duke nisur atë që do të bëhej një bashkëpunim afatgjatë dhe i frytshëm, duke ndikuar thellë në politikat tona të menaxhimit të ujit.

Me marrjen e detyrës filluam menjëherë t’i kthejmë propozimet tona në veprim. Angazhimi ynë për të përmirësuar kuadrin e sektorit të ujit ishte evident kur mbështetëm vazhdimësinë e Këshillit Ndërministror të Ujit më 4 Mars 2020. Kjo nismë mori rëndësi të mëtejshme gjatë pandemisë COVID-19, duke theksuar rolin kritik të menaxhimit të ujit në shëndetin publik dhe sigurinë.

Partneriteti ynë me Qeverinë Zvicerane, u forcua përmes memorandumit të bashkëpunimit të nënshkruar më 11 maj 2021, që u bë gurthemel i përpjekjeve tona për të përmirësuar qeverisjen e ujit. Ky bashkëpunim ka qenë i dobishëm në avancimin e nismave tona, veçanërisht në fushën e zbatimit të ligjit dhe të forcimit institucional.

Duke demonstruar qëndrueshmëri të palëkundur midis angazhimeve tona të bëra gjatë opozitës dhe veprimeve tona në qeveri, ne kemi adresuar në mënyrë sistematike secilin prej rekomandimeve kryesore të paraqitura në atë tryezë të diskutimit të vitit 2019. Këto diskutime jo vetëm që formësuan agjendën tonë të politikave, por gjithashtu janë pasqyruar besnikërisht në qeverisjen tonë.

Çdo hap që kemi ndërmarrë përputhet ngushtë me ato diskutime fillestare, duke siguruar që rruga jonë të mbetet e vërtetë ndaj vizionit që kemi parashtruar përpara marrjes së detyrës. Pra, shumë mendim e diskutim para veprimit.

Në ndjekjen tonë të menaxhimit të qëndrueshëm dhe efektiv të resurseve ujore, kemi ndërmarrë veprime vendimtare në disa fusha. Filluam duke avokuar për rritjen e zbatimit të ligjit të ujit; tani, jemi në prag të finalizimit të një ligji transformues për menaxhimin e burimeve ujore. Paralelisht, njohëm nevojën për të forcuar aftësitë tona institucionale, e për këtë qëllim, kemi rishikuar ligjin për nëpunësit publikë, duke përshpejtuar proceset e rekrutimit, ditëve në vijim, për të forcuar institucionet e burimeve ujore dhe për të rritur aftësitë e inspektimit ditëve në vijim.

Jemi angazhuar për monitorim të fuqishëm dhe përmirësime të infrastrukturës. Zbatimi i mbikëqyrjes së të ujërave nëntokësore dhe pajisja e Institutit Hidrometeorologjik, janë realizuar përmes një kredie të Bankës Botërore dhe projekteve të bashkëfinancuara nga Zvicra dhe Qeveria.

Ne kemi bërë gjithashtu hapa të rëndësishëm në planifikimin strategjik. Tani jemi duke miratuar në mënyrë aktive Planet e Menaxhimit të Pellgjeve Lumore për Drinin e Bardhë, të përkrahur nga SIDA suedeze dhe për tri pellgjet tjera – Ibër, Lepenc dhe Morava e Binçës, të mbështetur nga Zyra Zvicerane për Bashkëpunim. Për më tepër, kemi zhvilluar një strategji koncize dhe të zbatueshme për ujin për periudhën 2023-2027, duke siguruar që menaxhimi ynë i ujit të përputhet me nevojat shtetërore dhe standardet ndërkombëtare.

Sa i përket zhvillimit të digave, progres i dukshëm përfshin digat e Kamenicës dhe Firajës, kjo e fundit është thelbësore në sigurimin e ujit për Kosovën Juglindore, pra duke përfshirë rajonet e Gjilanit e Ferizajt, por edhe të Prishtinës. Studimet e fizibilitetit janë përfunduar po ashtu edhe për digat e Pollatës, Dragaqinës dhe Kuçicës dhe pikërisht sot në një ngjarje paralele me këtë tonën, po starton projekti i hartimit të Master Planit të Digave për Kosovën, i cili do të ofrojë një plan gjithëpërfshirës për zhvillimin e ardhshëm të resurseve ujore.

Për këtë çështje, dua të theksoj një dallim: qasja jonë ndaj zhvillimit infrastrukturor shënon një ndryshim të rëndësishëm nga qeveritë e kaluara. Përcaktimi i zonës së digës së Firajës, si zonë me interes kombëtar parandaloi keqpërdorimin e mundshëm dhe fryrjen e kostove që i pllakosnin projektet e mëparshme. Kjo masë proaktive ka vendosur një standard të ri për transparencën dhe efikasitetin në projektet kombëtare të infrastrukturës.

Duke ilustruar më tej planifikimin tonë proaktiv dhe parandalues, ne po i finalizojmë hartat e rrezikshmërisë dhe rrezikut nga përmbytjet, si dhe planet e menaxhimit të rrezikut nga përmbytjet, së bashku me fillimin e projekteve të mbrojtjes nga përmbytjet.

Jam i lumtur që gjithashtu po mbështesim zhvillimin e resurseve të reja njerëzore në sektorin e ujit, të demonstruar nga hapja e sektorit për profesionistë e rinj dhe nisjen e një programi master në menaxhimin e integruar të resurseve ujore nga tetori 2023, me mbështetjen e Qeverisë Zvicerane sërish . Ky program ka mirëpritur grupin e tij të parë prej 20 studentësh, duke përfshirë edhe dy nga komunitetet joshumicë dhe kështu duke nxitur gjeneratën e ardhshme të profesionistëve të ujit dhe duke siguruar pra diversitet e gjithëpërfshirje njëkohësisht.

Me këtë rast, më lejoni të shpreh mirënjohjen time më të thellë për qeverinë zvicerane dhe partnerët e tjerë ndërkombëtarë, mbështetja e të cilëve ka qenë e domosdoshme. Arritjet që ne festojmë sot, janë një dëshmi e përpjekjeve tona të përbashkëta gjatë dy dekadave e gjysmë të fundit. Falënderoj veçanërisht këshilltarët tanë të deleguar, ekspertiza dhe përpjekjet e palodhshme të të cilëve kanë qenë thelbësore në përparimin tonë. Kontributet e tyre janë të çmueshme dhe ne jemi thellësisht mirënjohës për përkushtimin e tyre.

Në vijim, ne po forcojmë rregullimin e koncesionimit për përdorimin komercial të resurseve ujore që duhet ta kuptojë secili se janë pronësi shtetërore. Udhëzimet më të rrepta do të sigurojnë që hidrocentralet dhe ambalazhuesit të funksionojnë me përgjegjësi. Qëllimi ynë është të garantojmë që këto burime të përdoren ligjërisht dhe në mënyrë të dobishme, duke balancuar interesat publike dhe private.

Pra, duam të dëshmojmë se është e mundshme të jemi edhe të dobishëm edhe të ligjshëm, të kemi edhe drejtësi edhe utilitet. Ndërsa ecim përpara, unë rikonfirmoj përkushtimin e qeverisë për të përmbushur trashëgiminë e përpjekjeve tona kolektive, që i kemi filluar me Këshillin Ndërministror të Ujit. Ky nuk është një fund, por një transformim drejt një bashkëpunimi edhe me më shumë ndikim.

Faleminderit për besimin, partneritetin, bashkëpunimin dhe përkushtimin për të siguruar një të ardhme të qëndrueshme ujore për Kosovën./Arbresh.info/