Kryeministri i Kosovës, Albin Kurti po vazhdon të i tregoj dëshmitë se forcat serbe kanë hyrë brenda territorit të Kosovës dhe i kanë rrëmbyer tre zyrtarë të policisë.

Kurti, në rrjetin social Facebook ka publikuar dëshmitë e fotografuara, si dhe ka thënë se tre policët ishin duke drekuar në momentin kur 15 persona i kanë sulmuar dhe rrëmbyer, përcjell Arbresh.info.

“Në momentin e rrëmbimit, tre policët tonë kanë qenë te tryeza e improvizuar për ngrënie, duke drekuar së bashku. Ata janë rrethuar nga 15 persona që i kanë sulmuar dhe i kanë rrëmbyer”, ka shkruar Kurti.

“Ambasadori ynë në Beograd, Jetish Jashari, sot i ka vizituar ndaras të tre policët, të cilët po mbahen peng nga Serbia. Janë tri rrëfime identike nga tre policët”, u shpreh tutje ai.

“Vendi ku ndodhet tryeza e ngrënies është 7 metra prej veturës së policisë. Pikërisht në atë vend ku e kemi theksuar qysh me datën 15 qershor: 1 kilometër në brendi përgjatë rrugës së bllokuar ilegale, dhe 300 metra, përkatësisht 670 metra, nga të dy anët larg kufirit e brenda Kosovës”, tha Kurti.

I pari i ekzekutivit kosovarë ka kërkuar lirim të menjëhershëm të zyrtarëve policorë si dhe kërkoi nga BE, SHBA dhe NATO të dënojnë agresionin e Serbisë.

“Ne jemi në të drejtën tonë, në të drejtën e Republikës dhe këtë e dokumentojnë qartë dëshmitë që posedojnë institucionet tona të sigurisë, si dhe dëshmia e tre policëve tanë. Kërkojmë lirimin e menjëhershëm të tre zyrtarëve policor. Ata duhet të lirohen pa kushte dhe të pacenuar”.

“Njëkohësisht kërkojmë nga faktorët ndërkombëtarë, Bashkimi Evropian, Shtetet e Bashkuara të Amerikës dhe NATO-ja që ta dënojnë agresionin e Serbisë që paraqet edhe shkelje të pikës 4 të Marrëveshjes tekniko-ushtarake të Kumanovës, nga 9 qershori të vitit 1999. Në mesditën e 14 qershorit, u ushtrua agresion i Serbisë ndaj shtetit demokratik të Kosovës, me rrëmbimin e tre zyrtarëve të Policisë sonë, thellë në brendi të territorit të Republikës”, shkroi në fund kryeministri Kurti./Arbresh.info