Kryeministri i Republikës së Kosovës, Albin Kurti ka përkujtuar 20 vjetorin e sulmeve terroriste ndaj SHBA-ve, të cilat sipas tij, ndryshuan përgjithmonë rrjedhën e historisë̈ dhe kuptimin e kësaj date.

Përmes një postimi në Facebook, Kurti ka kujtuar momentin e marrjes së lajmit për sulmin terrorist në kullat binjake në New York, shkruan arbresh.info.

Në atë kohë, Kurti po mbahej në burgun e Quprisë në Serbi, dhe tregon festën e gardianëve të këtij burgu pas sulmit që ishte bërë në kullat binjake.

“I gjithë burgu i Quprisë në Serbi ushtoi nga thirrjet e ekzaltimit dhe çirrjet e delirit të gardianëve. Mendova mos kishin shënuar Jugosllavia ose Cërvena Zvezda në ndonjë ndeshje sportive. Mirëpo jo. Aeroplanët e marrë peng kishin qëlluar dhe rrënuar kullat binjake në Nju Jork. Pasditja e zymtë e burgut u bë ditë e zezë e 11 shtatorit 2001. I kisha kaluar 2 vjet e 4 muaj e gjysmë nga 15 vjet burg sa më patën dënuar”, ka shkruar Kurti.

Këto sulme terroriste në Shtetet e Bashkuara të Amerikës, sipas tij, ndryshuan rrjedhën e historisë̈ dhe kuptimin e kësaj date, e cila do të jetë përgjithmonë̈ përkujtim i jetëve të humbura, por edhe i rëndësisë̈ së guximit dhe trimërisë̈ përballë fatkeqësive.

“Sot përkujtojmë 20 vjetorin e sulmeve vdekjeprurëse që na tronditën të gjithëve, nderojmë, me dhembje e solidaritet, familjet e 2977 viktimave të pafajshme dhe mbarë kombin amerikan. Kosova bashkëndjen thellë me Shtetet e Bashkuara të Amerikës, aleat historik dhe i pazëvendësueshëm i Kosovës”, ka shkruar Kurti./arbresh.info/