Kryetari i Komunës së Kamenicës, Qëndron Kastrati ka uruar fëmijët me rastin e fillimit të vitit të ri shkollor.

Kastrati përmes një shkrimi në Facebook u ka uruar fëmijëve shëndet, fat dhe shumë suksese.

“Ju inkurajoj të ndiqni ëndrrën dhe pasionin, e para të gjithave, t’i bëni detyrat e shtëpisë”, ka shkruar mes tjerash ai.

Shkrimi i plotë i Kastratit:

Urime viti i ri shkollor! Ju uroj shëndet, fat, dhe shumë suksese! Shkolla është rruga më e mirë për një jetë të përmbushur. E ardhmja është para jush. Do të keni mundësi të shumta për të ia dalë. Për të realizuar veten tuaj në plotni.

Është përgjegjësi e të gjithëve: nga prindtë, mësuesit, shkolla, komuna, shteti, e gjithë shoqëria, për të bërë më të mirën që dimë për ju. Të sigurohemi që edukimi është jo vetëm proces edukativ, por edhe socializues, atraktiv e inovativ për ju. Sot, koncepti i shkollës nuk është i njejtë me konceptin e gjyshit tuaj. Edukimi nuk fitohet vetëm nga ligjërimi i prindit apo mësuesit, por nga interaktiviteti me botën.

Kurioziteti juaj për botën do të bëjë ndryshimin. Andaj, ju ftoj të mos i ndalni pyetjet e interesimin. Të mos dorëzoheni para pengesave. Ju inkurajoj të ndiqni ëndrrën dhe pasionin, e para të gjithave, t’i bëni detyrat e shtëpisë. Nëse i bëni ato me rregull – që më vonë nënkupton marrjen e përgjegjësisë për rolin tuaj shoqëror – bota do të jetë më e mirë për të gjithë.

Mos harroni, jo të gjithë do të bëhen mjekë, apo juristë, apo ekonomistë. Disa bëhen poetë të mrekullueshëm, disa bëhen inxhinierë pa të cilët s’bënë, disa të tjerë bukëpjekës. E rëndësishme është që çkado që bëjmë ta bëjmë me përkushtim. E di që jo të gjithë e kemi fatin të jemi të përkushtuar dhe të korrim suksese. Ndonjëherë madje duket sikur mundi dhe rezultati nuk përputhen. Të gjithë kalojmë nëpër sfida.

Megjithatë, një gjë është e sigurtë: fati i prinë guximtarit. Kosova, ndonëse me gropa e gunga, ka prodhuar talentë të hatashëm në cdo fushë. Sot kemi inovatorë në teknologji, mjekë seriozë, e sportiste kampione. Ky mjek; ky sportist; apo ky ingjinier i ardhshëm mund të jesh ti. Mos u ndal por gjithëherë pyet, dëgjo, angazhohu!