Kryetari i Partisë Demokratike të Kosovës, Memli Krasniqi ka thënë se vdekja e hershme e gazetarit, Haqif Mulliqi na ka pikëlluar të gjithëve.

Përmes një postimi në Facebook, Krasniqi tha se gjatë kohës kur ka qenë ministër i Kulturës, ka pasur fatin që profesor Mulliqin ta ketë këshilltar e bashkëpunëtor të afërt, shkruan Arbresh.info.

“Qenka me të vërtetë e vështirë që t’u thuhet lamtumirë disa njerëzve, të cilët, me prezencën dhe personalitetin e tyre, kanë lënë kaq shumë kujtime pozitive. Ngushëllimet më të thella familjes, komunitetit artistik e akademik, dhe të gjithë atyre që e njohën profesorin Haqif. Faleminderit për miqësinë e shembullin që na le mbrapa, mik i dashur”, ka shkruar Krasniqi.

Postimi i plotë i kreut të PDK-së:

Para pak çastesh, në moshën 63 vjeçare, na la miku ynë i mirë, bashkëpunëtori i zellshëm, dramaturgu autentik, familjari i devotshëm e profesori i shquar, Haqif Mulliqi.

Një ikje e pa paralajmëruar si kjo, e hershme gjithsesi, na ka pikëlluar e lënduar shumë të gjithëve që kemi pasur fatin që, në njërën apo tjetrën mënyrë, të bashkëpunojmë me profesorin Haqif.

Reporteri ynë i luftës, zëri i të vërtetës historike, i cili na informoi nga vijat e fronteve të luftës çlirimtare që nga ditët e hershme të UÇK-së, do të mbetet i paharruar në kujtesën dhe përpjekjen e popullit tonë për liri.

Kam pasur fatin e madh që, gjatë punës sime si Ministër i Kulturës, profesorin Haqif ta kem këshilltar e bashkëpunëtor shumë të afërt.

Bashkë kemi punuar shumë, gjatë, pa orar, me vullnet e përkushtim për pak më shumë punë të mira për komunitetin artistik të vendit tonë.

Ishte gjithmonë frymëzuese dija, energjia dhe elani i tij për punë.

Qenka me të vërtetë e vështirë që t’u thuhet lamtumirë disa njerëzve, të cilët, me prezencën dhe personalitetin e tyre, kanë lënë kaq shumë kujtime pozitive.

Ngushëllimet më të thella familjes, komunitetit artistik e akademik, dhe të gjithë atyre që e njohën profesorin Haqif.

Faleminderit për miqësinë e shembullin që na le mbrapa, mik i dashur.

Lamtumirë!/Arbresh.info/