Në Kosovë aktualisht janë rreth 40 kompani që kanë licencë për dezinfektim.

Subjektet posedojnë leje të përkohshme 6 mujore për dezinfektim, dezinsektim dhe deratizim nga Ministria e Bujqësisë, Pylltarisë dhe Zhvillimit Rural.

Në mesin e kompanive që mund të bëjnë dezinfektimin janë edhe ‘VLORA A.AHMETI B.I’, “PRO-AGRO”SH.P.K’, dhe Ambulanca Veterinare,‘’Veterina’’ nga Drenasi.

E nga 84 sa është numri i plotë i këtyre kompanive të regjistruara ndër vite për këtë veprimtari, 46 tashmë u ka skaduar afati, ndërsa disa janë në procedurë të marrjes së lejes. Disa prej tyre leja u ka skaduar pikërisht në kohën kur vendi po përballet me pandeminë e koronavirusit.

arbresh.info në mars të këtij viti kishte raportuar se ky numër ishte rreth 60.

Ndërsa për vetëm rreth dy javë, listës së subjekteve me leje për dezinfektim, dezinsektim dhe deratizim i janë shtuar 11 të tillë.

Kështu ka bërë të ditur për Albulena Maloku, zyrtare e lartë për komunikim me publikun në Ministrinë e  Bujqësisë, Pylltarisë dhe Zhvillimit Rural.

Ajo kishte treguar edhe për procedurat që duhet ndjekur për  të marrë një leje të tillë nga Ministria e  Bujqësisë.

Një ndër kriteret që duhet përmbushur aplikuesi është diploma për përgatitje profesionale, Fakulteti i Bujqësisë, Agronomisë,  Veterinarisë, Epidemiologjisë , Ekologjisë.

Gjithashtu krejt në fund duhet bërë pagesa për leje në vlerë prej 40€.

“1.Kërkesa për leje;  2. Certifikatën e biznesit nga MEPTINIS( Ministria e Ekonomisë, Punësimit, Tregtisë, Industrisë,  Ndërmarrësisë dhe Investimeve Strategjike); 3. Certifikatë e numrit fiskal nga Ministria e Financave dhe Transfereve; 4. Diploma për përgatitjen profesionale (Fakulteti i Bujqësisë, Agronomisë, Veterinarisë, Epidemiologjisë , Ekologjisë); 5. Procesverbalin nga inspektori fitosanitar; 6. Fletëpagesën e taksës për leje në vlerë prej 40€”, ka thënë ajo.

Ndërsa procedurat zgjasin më së shumti 10 ditë dhe lejet  janë valide 6 muaj.

Pas shpalljes së pandemisë, institucionet dhe komunat në vend kanë ndarë nga disa herë para për dezinfektim të objekteve dhe hapësirave publike.

Ndër to edhe Komuna e Fushë Kosovës.

Ajo ditë më parë kishte dhënë tenderin për dezinfektim të objekteve kolektive banesore, objekteve afariste e që i ka kushtuar afër 40 mijë euro.

E në mesin e tri operatorëve ekonomik që kanë aplikuar fitues ka dalë  ‘Haki Bytyçi B.I’ nga Istogu.

Ndërsa vlera e përgjithshme e kontratës ishte rreth 40 mijë euro ose saktësisht 39.600,35 euro. /Agnesa Çitaku /arbresh.info/