Pas raporitmit të kryeministrit në detyrë, Albin Kurti, se është kërcënuar nga “Garda Vullnetare Shqiptare”, kërkesë për hetim për këtë rast ka bërë zëdhënësi i Partisë Demokratike të Kosovës, Avni Bytyçi.

Bytyçi përmes një postimi në llogarinë e tij në Facebook ka kërkuar të hetohet ky rast bazuar në dyshimin se ky kërcënim mund të jetë sajesë e vet Kurtit për ”të ndjellë panik e pasiguri tek qytetarët”, dhe për t’i “kërcënuar e frikësuar gjyqtarët” e Kushtetueses.

Postimi i tij i plotë:

Kërcënimi më jetë i deklaruar nga Kryeministri tani më i shkarkuar nga e ashtuquajtura “Garda Vullnetare Shqiptare” duhet të hetohet urgjentisht nga organet e rendit dhe të drejtësisë. Kjo është një çështje shumë serioze!

Është më rendësi për qytetarët dhe për vendin tonë që të qartësohet saktë së a ka qenë i vërtetë ky kërcënim dhe nëse po, çfarë rreziku paraqet ky grup i padëgjuar më parë, por edhe të sqarohen dyshimet se kjo mund të jetë një sajesë tjetër e kryeministrit në detyrë për të ndjellë panik e pasiguri tek qytetarët, duke shfrytëzuar këtë rast edhe për t’i kërcënuar e frikësuar gjyqtarët e Gjykatës Kushtetuese.