Kryetari i Komunës së Mitrovicës, Bedri Hamza, është shpallur si kandidati i Partisë Demokratike të Kosovës (PDK), për kryeministër në zgjedhjet e ardhshme parlamentare.

Të mërkurën në një konferencë për media, të thirrur nga kryetari i Partisë Demokratike të Kosovës (PDK), Memli Krasniqi, Hamza u zyrtarizua nga PDK si kandidati i tyre kundër kryeministrit aktual, Albin Kurti.

Madje, në këtë konferencë, kreu i PDK-së, e paralajmëroi Kurtin, duke thënë se loja ka ndërruar dhe nëse dikush duhet të ketë frikë nga ky kandidim, ai duhet të jetë kryeministri aktual.

Opozita ka mirëpritur emrin e PDK-së për Kryeministër.

Në një prononcim për Arbresh.info deputetet Time Kadriaj dhe Valentina Bunjaku, kanë fjalë të mira për Hamzën.

Deputetja Time Kadriaj nga Aleanca për Ardhmërinë e Kosovës (AAK),  e cilëson si njeri pozitiv dhe i respektuar, Bedri Hamzën.

“Sa e njoh Bedri Hamzën, është njeri i respektuar, është njeri punëtor, ka qenë ministër, është pozitiv”, shprehet Kadrijaj.

Deputetja nga radhët e AAK-së, thotë se e respekton vendimin e PDK-së dhe se kjo parti e ka lirinë e propozimeve.

Ndërsa, shton se ka respekt gjithashtu edhe për Bedri Hamzën si individ.

Nga ana tjetër, edhe Valentina Bunjaku nga Lidhja Demokratike e Kosovës (LDK), e sheh si të qëlluar propozimit e PDK-së për ta kandidatur Hamzës për kryeministër.

Por, sipas saj, kreu i LDK-së, Lumir Abdixhiku është zgjedhja e duhur për Kosovën.

“Vlerësoj si serioze por mendoj që kryetari i LDK z.Lumir Abdixhiku është zgjidhja më e duhur për Kosovën në qeverinë e ardhshme. Vendi ynë tanimë kërkon profil të një kryeministri të ri e pragmatik, tipare që i posedon në plotin z.Abdixhiku”, shprehet deputetja e LDK-së.

Arifi: Hamza kundërshtarë i fortë i Kurtit

Se a e sheh kryeministri aktual, si kundërshtar të fortë, Bedri Hamzën, analisti Dritero Arifi mendon se Kurti thellë në brendësi e sheh si kundërshtar të tij.

“Mendoj, që Kurti e cilëson si kundërshtar të fortë, sepse thellë në brendës të tij e dinë,  ai është një profesionist i jashtëzakonshëm  por në publik ai do të sillet kinse është i pamposhtur”, thotë  ai.

Sipas tij, për momentin nuk mund të jepet një përgjigje e saktë se a mundet PDK-ja me Bedri Hamzën ta mposht Albin Kurtin, por që është i sigurt që PDK do e zbeh  jashtëzakonisht shumë fuqinë e Vetëvendosjes dhe për këtë ai shprehet i  sigurt.

“Sepse duhet kuptuar se Bedri Hamza përfaqëson një politikan jo të zakonshëm, por më shumë përfaqëson një njeri profesionist  dhe i cilit një farë mënyre qytetarët e Kosovës i besojnë për shkak të angazhimit ë tij profesional dhe kjo mund të jetë një politikë kthesë e cila do ta dëmtojë jashtëzakonisht shumë Vetëvendosjen gjatë rrugëtimit”, shprehet Arifi.

Ai pohon se ende ka kohë deri në zgjedhje dhe se  mund të ndodhin shumë gjëra.

Por, ajo që e beson është se roli i Lëvizjes Vetëvendosje do të dobësohet jashtëzakonisht në garën e Bedri Hamzës  për kryeministër.

Ndryshe, kryetari i Partisë Demokratike të Kosovës, Memli Krasniqi  të mërkurën në një konferencë për media, njoftoi se Bedri Hamza do të jetë kandidat i PDK-së për kryeministër të Republikës së Kosovës.

Krasniqi, dje u shpreh se Hamza është njeriu i duhur për këtë pozitë dhe për kohën në të cilën po kalon Kosova, andaj edhe i ka kërkuar që të marrë këtë përgjegjësi.

Madje kreu i PDK-së propozoi 9 qershorin e këtij viti për mbajtjen e zgjedhjeve parlamentare.

Lajmin për kandidaturën e Bedri Hamzës e  mirëpriti edhe nënkryetarja e kësaj partie, Vlora Çitaku, e cila tha se është krenare me familjen politike të cilës i takon, derisa tha se për Bedri Hamzën flet puna dhe angazhimi i tij./Arbresh.info/Kujtesë Berisha/