Presidenti i Komisionit Evropian, Jean-Claude Juncker, tha në Beograd se Bashkimi Evropian nuk mund t’i pranojë ato vende që nuk i kanë zgjidhur reciprokisht mosmarrëveshjet territoriale.

Junker pas takimit me presidentin serb Aleksandër Vuçiq, tha se është optimist për rrugën e Serbisë në BE.

“Bindja ime është se ne nuk mund të pranojmë vende në BE që nuk kanë zgjidhur mosmarrëveshjet territoriale mes tyre. Ne nuk mund të importojmë mosmarrëveshje dypalëshe. Është e rëndësishme që këto mosmarrëveshje të zgjidhen para se të bashkohen me BE-në, sepse ne duam t’i japim stabilitet vendeve të Ballkanit dhe nuk importojmë paqëndrueshmëri”, shpjegoi ai, shkruajnë mediat serbe, përcjell Telegrafi.

Ai tha se BE do që të normalizojë marrëdhëniet në mes Beogradit dhe Prishtinës me një marrëveshje të detyrueshme ligjore.

Ndërkaq, presidenti serb Alesandër Vuçiq theksoi se vizita e Junker është një bisedë e hapur.

“Në Bruksel flitet shumë për Serbinë. Doja të bisedoja drejtpërdrejt për serbët dhe Serbinë. Është e lehtë të flasësh për të tjerët duke mos i dëgjuar ata. Kjo nuk është një vizitë inspektimi, por një bisedë e hapur”, theksoi Vuçiq.

Juncker tha se kjo ishte një vizitë përpara Samitit të planifikuar në Bullgari që do të mbahet në muajt e ardhshëm.

“E gjithë kjo tregon se sa kujdesemi për marrëdhëniet me Ballkanin Perëndimor dhe se janë prioritet për ne. Gjithmonë kam besuar se Ballkani Perëndimor dhe Serbia duhet të jenë pjesë e BE-së, sepse pa to BE-ja nuk është e plotë”, theksoi ai.

Sa për datën e pranimit të Serbisë në BE, ai tha se kjo nuk varet nga BE-ja, por nga vetë Serbia.

“Unë e di se ka shumë njerëz që flasin për vitin 2025, por unë dua të jem i qartë se ky nuk është një premtim, por perspektiva apo data indikative është inkurajim për shkak se një vend që dëshiron të bëhet anëtar duhet të bëjë përpjekje të mëdha dhe duhet të inkurajohen në këtë drejtim”, tha ai.

Presidenti i Serbisë, Aleksandër Vuçiq tha se ne duhet të kuptojmë se sa dhe pse është e rëndësishme për të arritur një kompromis me Prishtinën, përndryshe do të themi “mbytemi në të kaluarën tonë”.

“Kjo është çështja më e vështirë për ne dhe kjo është një pyetje për Serbinë të gjithë qytetarët tanë dhe për të ardhmen tonë”, tha ai. /Telegrafi/