Kryetari i SBAShK-ut, Rrahman Jasharaj ka pritur sot në selin e tij kryetarin e AAK-së, Ramush Haradinajn me të cilin biseduan rreth gjendjes aktuale të arsimit në vend.

Pas takimit, në një prononcim për media, Jasharaj deklaroi se situata me tekstet shkollore është tmerrësisht e keqe dhe sipas tij, edhe mësimdhënësit janë thellësisht të indinjuar e prindërit janë të prekur dhe të nervozuar.

“Pikëpyetja më e madhe është, grevë nuk ka, mësimi do të fillojë të premten, por do të kemi nxënës dhe mësimdhënës pa mjetin e vetëm, fatkeqësisht pa tekste shkollore dhe nuk dihet se kur do të arrihet që të kompletohemi me tekste shkollore”, u shpreh Jasharaj.

Tutje, ai shtoi se në emër të anëtarësisë iu dha rasti që Haradinajt t’i shprehte mirënjohje për kontributin e tij për mësimdhënësit.

“I premtova se do të vazhdojmë betejën për dije me kushtet që i kemi”, shtoi ai.

Ai kërkoi po ashtu që koeficienti në paga të rritet sepse sipas tij, po mbeti ky koeficient edhe gjatë, do të kemi ikje.

“Janë diku 300 kolegë që kanë kërkuar pushim pa pagesë, dhe kam frikën së këtë pushim ata mund ta shfrytëzojnë për të dalë jashtë shtetit, dhe nëse rehatohen atje nuk do të kthehen dhe pastaj të tjerët do ta ndjekin të njëjtën rrugë, dhe ç’na duhen nxënësit në shkollë pa mësuesin shqiptar në ato shkolla”, deklaroi tutje Jasharaj./Arbresh.info