Organizata Botërore e Shëndetësisë (OBSh) ka shpallur Lijan e Majmunit, tashmë e njohur si Mpox, si një emergjencë globale. Në Kosovë, ende nuk janë raportuar raste të kësaj sëmundjeje, por Instituti Kombëtar i Shëndetësisë Publike të Kosovës (IKShPK) ka lëshuar disa këshilla për qytetarët që udhëtojnë në vendet e Afrikës të prekura nga Mpox.

Sipas një vlerësimi të fundit nga Qendra Evropiane për Parandalimin dhe Kontrollin e Sëmundjeve (ECDC), ka një rrezik të rritur për raste të importuara të Mpox në vendet e Bashkimi Evropian (BE), të cilat janë shkaktuar nga virusi clade I që aktualisht qarkullon në Afrikë. Një rast i këtij virusi është regjistruar edhe në Suedi.

Megjithatë, ECDC thekson se gjasat e transmetimit të vazhdueshëm në Evropë janë shumë më të ulëta, nëse rastet e importuara diagnostikohen në kohë dhe merren masa të nevojshme për kontrollin e përhapjes së sëmundjes.

1.Informohuni për situatën rreth Mpox në shtetet e prekura nga infeksioni: OBSh dhe ECDC ofrojnë udhëzime të përditësuara për situatën epidemiologjike në shtetet
e prekura.

2. Praktikoni higjienën e duarve gjatë udhëtimit dhe qëndrimit: Lani duart shpesh me ujë dhe sapun për të paktën 20 sekonda, ose përdorni dezinfektues duarsh me të paktën 60% alkool.

3. Shmangni kontaktet me kafshët dhe njerëzit e infektuar: Mos kontaktoni me kafshë të egra si majmunët, brejtësit, etj., ose njerëz që kanë simptoma të mpox, siç janë skuqja, ethet ose puçrrat në lëkurë.

4. Qëndroni larg materialeve të infektuara të përdorura nga njerëz të sëmurë: Si p.sh. veshjet, krevatet, peshqirët ose materialet e përdorura në mjediset e kujdesit shëndetësor).

5. Shmangni kontaktet seksuale, nëse Ju ose partneri juaj ka simptoma derisa të keni një rezultat negativ të testit.

6. Parandaloni infeksionin: Përdorni maska, veçanërisht në hapësira të mbyllura ose të mbushura me njerëz, dhe shmangni kontaktin e drejtpërdrejtë me lëngjet trupore ose plagët e infektuara.
7. Vaksinimi: Nëse në vendin ku udhëtoni, vaksinimi është i mundur, vaksinohuni, pasi që disa vaksina të lisë mund të ofrojnë mbrojtje kundër mpox.

8. Kujdesuni për ushqimin dhe ujin: Pini vetëm ujë të ambalazhuar dhe hani ushqim të gatuar mirë për të reduktuar rrezikun e infeksioneve të tjera që mund të përkeqësojnë gjendjen tuaj shëndetësore.

9. Izolohuni në rast të simptomave: Nëse zhvilloni simptoma të ngjashme me ato të mpox (ethet, lodhje, dhimbje muskulore, skuqje…), izolohuni menjëherë dhe kërkoni ndihmë mjekësore.
10. Kontrolloni shëndetin tuaj pas udhëtimit: Pas kthimit, monitoroni shëndetin tuaj për 21 ditë. Nëse zhvilloni ndonjë simptomë, kërkoni menjëherë ndihmë mjekësore, informoni mjekun tuaj për historinë tuaj të udhëtimit dhe testohuni!

IKSHPK shton tutje se këto rekomandime synojnë të minimizojnë rrezikun e infektimit dhe të ndihmojnë në mbrojtjen e shëndetit tuaj gjatë udhëtimit./Arbresh.info