Analisti politik, Ilir Ibrahimi ka thënë se synimi i administratës amerikane është që të emërojë pikërisht personat që do të mund të zgjidhnin nyjet që kanë mbetur në çështjen e Bosnje e Hercegovinës dhe mosmarrëveshjen Kosovë-Serbi.

“Sidomos me emërimin e Christopher Hill, i cili njihet te ne në vitet 98-99 shuttle dhe kur ishte ambasador në Shkup dhe ishe personi kyç që merrej me ‘shuttle diplomacy’. Ndërkohë ai ka pasë poste shumë më të larta gjatë karrierës së tij diplomatike dhe para disa vjetësh ishte pensionuar. Të kthehet nga pensionimi në Beograd nuk është vetëm për postin e ambasadorit. Pra, do ta ketë detyrë parësore zgjidhjen e mosmarrëveshjes Kosovë-Serbi dhe duke pasë parasysh edhe natyrën diplomatike të tij, s’besoj që do të kemi shumë kohë, pra s’do të ketë vite për të arritur marrëveshjen. Kur kyçet një kastë e tillë diplomatësh nuk është se palët kanë aq shumë hapësirë manovruese”.

Ibrahimi në Klan Kosova ka thënë se në këtë drejtim Qeveria e Kosovës duhet të jetë më e angazhuar në tavolinën e negociatave derisa shtoi se edhe partitë politike s’duhet ta përdorin këtë temë për debate në Parlament që në fokus kanë interesin partiak.

“Këto mesazhe duhet të lexohen drejt edhe nga pala kosovare, nga e cila s’po e shoh ende një gjë të tillë sepse ne mund të vijmë para një akti ku na vihen dokumentet përpara dhe të mos jemi pjesë proaktive e përpilimit të këtyre dokumenteve. Pra, nëse vijmë te një qasje e tillë jo domosdoshmërisht do të marrim maksimumin. Prandaj, inkurajoj Qeverinë e Kosovës që të jetë më më syhapur dhe të bëjë përgatitje më të madhe për t’u bërë partner në tavolinën e dialogut, sepse nëse s’je proaktiv atëherë do të bëhesh reaktiv dhe do të reagosh prej propozimeve që mund të vijnë”.

Ndërkaq, për situatën e krijuar në Bosnje e Hercegovinë, Ibrahimi tha se ka tentativa për ndryshime kushtetuese për ta bërë atë një shtet që i adaptohet më shpejt realitetit të sotëm, meqë Marrëveshjen e Dejtonit e sheh si kalimtare për ta ndalë luftën dhe për t’i dhënë mundësi paqes.

“Diplomacia amerikane është e vendosur për të arritur një rezultat , përndryshe nga BE. Jam shumë i lumtur që e shoh një rikyçje të diplomacisë amerikane se tregon që rajoni i Ballkanit vazhdon të jetë në sferën e interesit strategjik amerikan”.