I dërguari amerikan për Ballkanin Perëndimor, Alexander “Sasha” Kasanof, do të vizitojë këtë javë Kosovën, ka thënë një zëdhënëse e Ambasadës amerikane, në një përgjigje për Radion Evropa e Lirë.

Në përgjigje është thënë se Kasanof do të zhvillojë konsultime të rregullta me zyrtarë të Qeverisë, liderë të opozitës, shoqërinë civile dhe bizneset.

Kjo do të jetë vizita e tij e parë në Kosovë, ndonëse ai është takuar me presidenten e Kosovës, Vjosa Osmani dhe kryeministrin e vendit, Albin Kurti, në margjina të samiteve të mbajtura në Pragë dhe Nju Jork.

Paraprakisht, këtë rol e ka pasur Gabriel Escobar, mandati i të cilit ka përfunduar në maj.

Kasanof, që nga 19 korriku, është edhe zëvendës i ndihmësit të sekretarit për Media dhe Diplomaci Publike në Byronë për Çështje Evropiane dhe Euroazi të Departamentit amerikan të Shtetit.

Sipas biografisë së publikuar në ueb-faqen e Departamentit amerikan të Shtetit, ai ka shërbyer si asistent ekzekutiv nën ish-nënsekretaren për Çështje Politike, Victoria Nuland, dhe gjatë mandatit të ushtruesit të detyrës së nënsekretarit për Çështje Politike, John Bass.

Kasanof ka shërbyer në Irlandë, Turkmenistan, Kili dhe Ukrainë.

Ai ka marrë çmim për punën e tij si këshilltar politik në Ambasadën në Kiev gjatë Revolucionit të Maidanit dhe më pas pushtimit rus të Ukrainës.