Zëvendëskryeministri i Republikës së Kosovës, Enver Hoxhaj ka përgënjeshtruar lajmin e publikuar në mediat serbe në lidhje me gjoja intervenim të mundshëm të Policisë së Kosovës në veri të Kosovës.
Hoxhaj tha se mediat serbe po vazhdojnë ta manipulojnë publikun me lajme të rrejshme në lidhje me Kosovën, dhe se këto lajme kanë për qëllim destabilizimin e vendit.

Hoxhaj tha se lajmi i publikuar në portalin serb Informer është lajm i rrejshëm që tenton të nxisë tensione në Mitrovicën veriore.

“Mediat serbe po vazhdojnë ta manipulojnë publikun me lajme të rrejshme në lidhje me Kosovën. Lajmi i publikuar sot nga një portal, i cili njihet për tendencën e manipulimit dhe lajmeve të rrejshme, për gjoja intervenim të Policisë së Kosovës në Mitrovicën veriore, është lajm i rrejshëm dhe qëllim keq, i cili synon të nxisë tensione në veri të Kosovës”, ka shkruar Hoxhaj.

Hoxhaj shtoi se Policia e Kosovës është institucion me përbërje multi-etnike, në shërbim të të gjithë qytetarëve.

“Këtë e ka dëshmuar edhe vlerësimi ndërkombëtar si policia më profesionale në rajon”, ka përfunduar Hoxhaj.

Portali serb, Informer, gjatë ditës së sotme ka publikuar një shkrim ku flitet për gjoja intervenim të Policisë së Kosovës në veri të vendit, para datës 25 prill.

Informer njihet si portal tendencioz që jo-rrallëherë shpërndan lajme të rrejshme për të nxitur tensione në Kosovë.