Kryeministri në detyrë, Ramush Haradinaj ka komentuar të gjithë kandidatët e tjerë për kryeministër.

Për Vjosa Osmanin, e cila është kandidate për kryeministre nga radhët e Lidhjes Demokratike të Kosovës, thotë se ka dyshime për qëndrueshmërinë e saj. Sipas Haradinaj, Osmani nuk shquhet për qëndrueshmëri në ndonjë rast specifik, por njihet vetëm për atë që ka dhënë në “pozicione publike e teorike”.

Thotë që ka dyshimet e tij nëse Vjosa Osmani do ta përballonte presionin që Kadri Veseli e Hashim Thaçi ia kishin bërë atij, në lidhje me taksën.

“Nuk e di sa ka qëndrueshmëri. Nuk e njoh prej një situate të caktuar dhe nuk e di sa mund të përballet me sfidat që e presin vendin, nuk e di sa mundet Vjosa me i kalu këto që i kam kaluar unë, për shembull kur i ke në dy anët persona që po punojnë kundër, nuk e di sa mundet me i kalu këto etapa” është shprehur Haradinaj në T7.

Ndërkohë Albin Kurtin, kandidat i lëvizjes Vetëvendosje për kryeministër, e ka quajtur edhe njëherë tjetër mashtrues. Sipas Haradinajt, nëse Kurti ka rrëzuar një kamion me mallra serbe, qeveria e tij ka ndaluar tërësisht ato.

“Shumicën e temave që i ka thënë ai i ka zbatuar Qeveria Haradinaj. Nëse dikush e ka nal një kamion të Serbisë, ne e kemi marrë vendimin. Nëse ka fol për ushtri u kry, pra po thom ashtu si ide këshilldhënëse i ka të mira, por edhe te ky shihet një mungesë e qëndrueshmërisë” është shprehur Haradinaj.

Sipas tij, Kurti është mashtrues pasi që ka ndryshuar qëndrime për simbolet e Kosovës.

“Për shembull që tha i respektoj simbolet e Kosovës. Po vërehet njëfarë dallimi i madh. S’po di a mundesh me i besu dikujt, që ndërron veç nëse e din që është afër karrigës. Kam thënë se është mashtrues, se na paska mashtru kur s’u qu për himnin. Qe një kohë ma s’ia kemi parë shqiponjën”, tha ai.

Ndërsa për Kadri Veselin ka përmendur disa momente kur ai dhe Hashim Thaçi ia kishin kthyer shpinën Haradinajt, për çështje madhore të Kosovës.

Tha se ky i fundit nuk ka pasur qëndrueshmëri, prandaj sipas tij ai nuk i ka përfaqësuar denjësisht as përkrahësit e Partisë Demokratike të Kosovës.

E për Fatmir Limajn, Haradinaj nuk pati shumë për të dhënë, përveçse u shpreh që Limaj ka një qasje pragmatike.