“Është vizita e parë e imja kjo në Kosovë si Sekretar Shteti për Punë të Jashtme. Mbretëria e Bashkuar është mbështetëse e madhe e Pavarësisë, sovranitetit dhe do të ndihmojë në sjelljen e njohjeve të reja për Kosovën”, deklaroi ministri i Punëve të Jashtme të Mbretërisë së Bashkuar, Lordi David Cameron pas takimit me ministren e Jashtme, Donika Gërvalla, në kuadër të vizitës së tij të parë jashtë vendit për vitin 2024.

“Britania e madhe, përveç rolit të rëndësishëm që luan në KFOR, trajnon dhe mbështet forcat e armatosura  të Kosovës dhe kontribuon në suksesin e tyre edhe përmes trajnimeve në Mbretërinë e Bashkuar”, ka shtuar më tej Cameron, përcjell Arbresh.info.

Gjatë këtij takimi, Gërvalla ka njoftuar kryediplomatin britanik rreth progresit dhe zhvillimit të jashtëzakonshëm të Kosovës në fusha të ndryshme, e sidomos në atë të sundimit të ligjit, dhe forcimit të demokracisë në vend gjatë vitit 2023, duke vënë në pah në të njëjtën kohë sfidat e rënda me të cilat u përball shteti i Kosovës duke përfshi sulmin e 24 shtatorit, pas të cilit Mbretëria e Bashkuar reagoi menjëherë dhe me vendosmëri duke dërguar trupa shtesë.

Lexo edhe:

Cameron në Kosovë: Britania duhet t’i përkrahë miqtë e saj në një botë me konflikte të mëdha

“Mbretëria e Bashkuar për Kosovën është një partner i veçantë strategjik si në marrëdhëniet tona bilaterale, ashtu edhe multilaterale. Në këtë kontekst e falënderova Lordin Cameron për mbështetjen e vazhdueshme në procesin e anëtarësimit në Këshillin e Evropës”, ka deklaruar Gërvalla.

“Ajo më tej vlerësoi se Mbretëria e Bashkuar për Kosovën është partner tejet i rëndësishëm brenda NATO-s, pra aty ku Kosova e sheh veten pjesë të synimeve strategjike dhe përcaktimeve parimore të kësaj organizate”, thuhet në njoftimin e MPJD-së.

Nga ana tjetër, Cameron ka falënderuar Ministren Gërvalla për mikpritjen dhe shprehu mbështetjen e palëkundur të shtetit britanik ndaj Kosovës.

Lexo edhe:

Osmani pret në takim ministrin e Jashtëm britanik, David Cameron

“Tutje Lordi Cameron deklaroi që me Ministren Gërvalla diskutuan për sigurinë, rritjen ekonomike, luftën kundër korrupsionit dhe ndërtimin e shtetit, duke theksuar se Mbretëria e Bashkuar është mbështetëse e madhe e Pavarësisë, sovranitetit dhe do të ndihmojë në sjelljen e njohjeve të reja për Kosovën”, thuhet tutje në komunikatë./Arbresh.info