Në incidentin që ndodhi në lagjen e Boshnjakëve në veri të Mitrovicës, 56 vjeçari, Murat Kuçi, i nacionalitetit boshnjak, u qëllua me armë zjarri duke mbetur i vdekur në vend.

E familjarët thonë se i ndjeri nuk kishte probleme me askënd.

‘U kon 4 vite pronar i atij lokali, problem s’ka pasë kurrë. E ka majtë familjen…u mundu me punu… problem s’ka pase sa di unë”, tha një familjar i tij.

Ata as nuk dyshojnë në dikënd.

“Sen nuk dimë. Të kqyrim çka po thotë policia, ekspertiza”, tha ai.

E rastin për Klan Kosovën përmes telefonit, e ka konfirmuar edhe zëdhënësi i policisë për rajonin e Mitrovicës, Besim Hoti.

Ai ka bërë të ditur se menjëherë pas aktit është arrestuar një person i dyshuar, mashkull i nacionalitetit serb , me inicialet D.S 33 vjeçar.

Personi i dyshuar, armën me të cilën besohet se ka kryer vrasjen e ka hedhur në një vend tjetër, ndërsa prokurori i cili ka qenë në vendin e ngjarjes , vrasjen e ka cilësuar si vrasje të rëndë, por pa u përcaktuar motivet.

Trupi i pajetë i viktimës ishte dërguar për obduksion, e pasditen e së shtunës u varros.

Ai ka lënë pas vetes gruan, tre djem, dhe një vajzë.

https://www.youtube.com/watch?v=gM7gzvS4Jvk