Ka filluar sot fushata globale “16 ditët e aktivizmit kundër dhunës me bazë gjinore”.

Kryeministri i vendit, Albin Kurti, në hapje të fushatës bëri thirrje për ndërgjegjësim, për drejtësi e për barazi, për të mbrojtur dinjitetin njerëzor, për një shoqëri ku çdo grua dhe vajzë ka të drejtën të jetojë e lirë, e të ëndërrojë pa frikë, transmeton Arbresh.info.

Në fjalën hyrëse, Kurti tha se në këto 16 ditë nderojmë viktimat, mbështesim të mbijetuarat, flasim zëshëm e veprojmë bashkë.

“Si qeveri, po veprojmë çdo ditë. Po forcojmë ligjet. Po rrisim ndihmën për strehimoret. Po fuqizojmë gratë ekonomikisht”, tha ai, duke shtuar se në përkrahje të viktimave të dhunës në baza gjinore kemi ndarë tre milionë euro mbështetje financiare për strehimoret dhe organizatat e licensuara në fushën e shërbimeve sociale dhe familjare gjatë vitit 2023 dhe 2024, po ofrojmë ndihmë juridike falas për viktimat e dhunës në familje dhe me bazë gjinore, pavarësisht gjendjes socio-ekonomike, ndërsa për t’ua lehtësuar financiarisht përballjen me pasojat e dhunës, kemi miratuar Ligjin për Kompensimin e Viktimave të Krimit.

Në kuadër të mbështetjes, kryeministri përmendi zbatimin e masës së punësimit për gratë që janë viktima të dhunës. Përmes kësaj mase, qeveria subvencionon 70% të pagës së të punësuarave për gjashtë muaj me radhë. Pastaj lansimin e programit psiko-social për trajtimin e kryerësve të dhunës në familje dhe po zbatojmë Strategjinë Kombëtare për Mbrojtje nga Dhuna në Familje dhe Dhuna ndaj Grave, me ç’rast 87% e aktiviteteve janë zbatuar plotësisht ose janë në zbatim e sipër.

Më tej, Kurti theksoi se jemi të vetëdijshëm që dhuna me bazë gjinore është fenomen global, produkt i sistemit patriarkal të funksionimit së shoqërisë e i kapitalizmit neoliberal dhe fatkeqësisht një fenomen ndaj të cilës nuk janë imune as shoqëritë e përparuara perëndimore.

Andaj, ndonëse aktivizmi i ynë për të luftuar këtë dhunë është i përqendruar në nivel lokal, ai theksoi se ky problem i tejkalon kufijtë tanë.

“Ligjërimet e rikthyera të lëvizjeve të ekstremit të djathtë që trumbetojnë kthimin në formën tradicionale të jetesës nuk kanë ndonjë vizion tjetër përpos rimarrjen e kontrollit mbi trupat e grave. Dhuna me bazë gjinore është veç zgjatim i kësaj mendësie arkaike që nuk duron shoqëria të funksionojë në parime të barazisë. Andaj, politike është edhe personalja e grave – e drejta mbi lirinë për të jetuar jetën e për të pasur mirëqenien pa diktatin e hegjemonisë së shoqërive patriarkale e të shfrytëzimit ekonomik”, tha Kurti.

Ai shtoi se “duke luftuar dhunën, angazhohemi për lirinë. Duke fuqizuar gratë, forcojmë shoqërinë, shpijmë përpara barazinë dhe zhvillimin në shtetin tonë” dhe beteja nuk është vetëm e grave, por e burrave dhe grave së bashku, sepse një shoqëri e lirë nga dhuna është shoqëri më e fortë, më e drejtë dhe më njerëzore

Ndërkaq ministrja e Drejtësisë, Albulena Haxhiu tha se “16 Ditë të Aktivizmit” nuk janë thjesht një periudhë simbolike, por një thirrje për veprim të pandërprerë dhe të palëkundur; një thirrje për të shkatërruar heshtjen që shpeshherë mbulon dhunën dhe për të krijuar një kulturë ku dhuna nuk tolerohet, por dënohet ashpër. Përmes kësaj fushate, tha më tej ajo, dërgojmë një mesazh të qartë: dhuna nuk është çështje private, por problem shoqëror që kërkon zgjidhje dhe angazhim kolektiv.

“Ne e dimë se dhuna nuk njeh kufij socialë apo ekonomikë; ajo prek çdo shtresë të shoqërisë dhe dëmton jo vetëm individët, por edhe brezat e ardhshëm. Për këtë arsye, kjo fushatë është një thirrje për ndërgjegjësim, për të shpërbërë normat dhe stereotipat që lejojnë dhunën të mbijetojë. Nëse duam një shoqëri të barabartë dhe të drejtë, duhet të ndalojmë së toleruari çdo formë të dhunës dhe diskriminimit”, u shpreh ministrja Haxhiu.

Fushata globale “16 ditët e aktivizmit kundër dhunës me bazë gjinore” për vitin e tretë radhazi po organizohet nga Ministria e Drejtësisë./Arbresh.info