Zëvendësministri i Infrastrukturës, Hysen Durmishi ka bërë të ditur se vitin e ardhshëm rruga Prishtinë-Podujevë do të jetë e përfunduar.

Përmes një postimi në Facebook, Durmishi tha se tani e kanë vendimin e OSHP-së i cili është në favor të ministrisë, përcjell Arbresh.info.

Postimi i plotë:

Lajmet që nuk jepen: Rruga Prishtinë – Podujevë dhe ankesa në OSHP

Në kohën kur i nënshkruam kontratat dhe filluam punimet u bë shumë zhurmë gjithandej nëpër media. Bëhej fjalë për një ankesë në OSHP, nga një kompani e cila nuk kishte të drejtë ankese, sepse nuk ishte lider i konsorciumit dhe nuk ishte i autorizuar që të përfaqësonte konsorciumin. Ne në atë kohë e sqaruam këtë çështje dhe me të drejtë i kishim nënshkruar kontratat. Sulmoheshim vazhdimisht me muaj të tërë sepse dikujt i pengonte suksesi ynë në ndërtimin e kësaj rruge. Atje punimet po zhvilloheshin përtej dinamikës së planifikuar.

Dhe tani e kemi edhe vendimin e OSHP-së, që është në favorin tonë. Kaluan 22 ditë prej kur është marrë vendimi dhe asnjë medie nuk e ka publikuar deri më sot. A thua pse?

Paramendoni se çfarë do të ndodhte sikur të mos i nënshkruanim në atë kohë kontratat.

Kontratat do të mund t’i nënshkruanim vetëm tani në dhjetor dhe punimet nuk do të mund të fillonin deri në vitin e ardhshëm.

Dëmi do të ishte shumë i madh sepse ende nuk do të kishim filluar me punime si dhe buxheti për vitin 2023 nuk do të shpenzohej.

Ne po ecim përpara e nuk po ndalemi e rruga Prishtinë – Podujevë vitin e ardhshëm do të jetë e përfunduar/Arbresh.info