Kryetari i Lidhjes Demokratike të Kosovës, Isa Mustafa ka thënë se Vetëvendosje nuk ka të drejtë të caktoj sesi LDK duhet të vendosë për Kryeministrin, duke lënë të kuptohet se në zgjedhjet e 6 tetorit do të garojnë ndaras shkaku i pozitës së Kryeministrit. 

Mustafa përmes një postimi në facebook ka shkruar gjithashtu se LDK e kërkon kryeministrin sepse e vlerëson Vjosa Osmanin, shkruan arbresh.info.

“Jam angazhuar, i mbetem besnik idesë dhe përkushtimit që vendi të qeveriset nga partitë e deritanishme opozitare, LDK dhe Vetëvendosje. Në situatën në të cilën gjendemi, këtë e konsideroj zgjidhjen më të mirë.  Sikurse LDK, ashtu edhe Lëvizja Vetëvendosje ka specifikat e veta. Ka njerëzit me të cilët llogarit fitoren dhe qeverisjen. Kanë ambientin e brendshëm, që dallon. Nuk i jap të drejtë LDK-së të përzihet se kush nga VV duhet të jetë Kryeministër i vendit. Por, nuk i jap të drejtë as VV të na caktojë sesi LDK duhet të vendosë për Kryeministrin dhe për njerëzit e fushatës. Bashkëpunimin e konsideroj proces të respektit reciprok. Kam gëlltitur të kaluarën, sepse e kam vlerësuar më lart interesin e vendit sesa vetëveten. Jemi shprehur pozitivisht për koalicion me VV në interes të forcimit të shtetit dhe dekriminalizimit të vendit. LDK, nuk e kërkon Kryeministrin, sepse nënvlerëson z. Albin Kurti dhe meritat e tij. Por se vlerëson znj. Osmani dhe kërkesat e anëtarësisë. Vlerëson kompetencën e LDK-së, ekipin e saj, për qeverisje të mire e pa korrupsion. Kjo është arsyeja e kërkesës tonë për Kryeministër”, ka shkruar ai.

I pari i LDK-së ka shtuar gjithashtu se nëse nuk pajtohen me VV për kryeministrin nuk do të thotë të hapim frontin.

“Në qoftë se jemi të bindur se edhe njërës edhe tjetrës palë i takon Kryeministri, kjo nuk do të thotë se duhet të hapim frontin ndërmjet veti. Kemi plot gjëra të mira që mund t’ia adresojë njëra palë tjetrës për bashkëpunimin tonë, por kemi edhe të këqia. Kjo nuk është mënyrë që ne të tentojmë të fitojmë vota. Më shumë preferoj të ndërtojmë front të përbashkët, para ose pas-zgjedhor, për t’ua pamundësuar PAN-ave dhe përkrahësve të tyre vazhdimin e shkatërrimi të shtetit”, ka përfunduar Mustafa.

Ndryshe LDK ditë më parë ka bërë të ditur se Vjosa Osmani është kandidatja e kësaj partie për kryeministre të Kosovës./arbresh.info/