Kosova e ka të përfunduar çështjen e shënimit të kufirit vetëm me Maqedoninë. Me tre fqinjët e tjerë, Shqipërinë, Serbinë e Malin e Zi, kufiri vazhdon të mos jetë i përcaktuar. Shteti më i ri në Evropë do ta ketë problem, sidomos përcaktimin e kufirit me Serbinë, vlerëson analisti politik, Avni Mazrreku.

Mazrreku, profesor i të Drejtës Evropiane, thotë se Serbia do ta ketë vështirë që të bisedojë për kufirin me Kosovën, ngase vijën kufitare e njeh si një vijë kufitare administrative, përderisa për Kosovën ky është kufi ndërshtetëror.

“E para çka duhet me u zgjidh midis dy vendeve, Serbisë dhe Kosovës, është pozicionimi i qartë se si kualifikohet kjo vijë kufitare. Pavarësisht që ka pasur një marrëveshje të ndërmjetësuar nga ana e Bashkimit Evropian për menaxhimin e integruar të kufirit, kjo më tepër ka shkuar në një kontekst të themi teknik të organizimit të qarkullimit të ndërsjellë të njerëzve dhe mallrave midis këtyre dy shteteve dhe nuk e ka zgjidhur këtë problem politik, të hapur midis këtyre dy shteteve”, tha Mazrreku në një intervistë për Ekonomia Online.

Ndryshimi i kufijve aktualë ndërmjet Kosovës dhe Serbisë është riaktualizuar ditëve të fundit nga ana e Serbisë. Ministri i Punëve të Jashtme të Serbisë, Ivica Daçiq, ka thënë se kjo do t’iu hapte rrugën të dy shteteve për integrim në Bashkimin Evropian. Por, ish-shefi i diplomacisë kosovare, Enver Hoxhaj, është përgjigjur se Kosova i ka të përcaktuar kufijtë, të njohur ndërkombëtarisht dhe që nuk mund të ndryshojnë.

Mazrreku paralajmëron se Serbia do të tentojë t’i marrë territor Kosovës, për shkak të pretendimeve që ka edhe ndaj pasurive në Kosovë.

“Një problem i pambyllur në të cilin ka qenë i involvuar edhe KFOR-i në Kosovë, sipas rezolutës 1244, është çështja e majës ku ka qenë i vendosur sistemi i radarëve të ish-Jugosllavisë, përkatësisht të Serbisë, të cilët radarë kanë qenë të bombarduar gjatë kohës së bombardimeve të NATO-s. Kjo pikë të themi që është e kontestuar nga ana e Serbisë dhe KFOR-it deri më tani, dhe më vonë do të jetë e kontestuar midis Kosovës dhe Serbisë”.

“Po ashtu një çështje tjetër që do të sjellë telashe në bisedimet në kontekst të demaskimit midis Kosovës dhe Serbisë është edhe çështja e liqenit të Gazivodës”, parashikon Mazrreku.

Numër i madh i dokumenteve që do të ndihmonin përcaktimin e kufirit ndodhen në Serbi, e shumica prej tyre janë të kohës së ish-Jugosllavisë.

Mazrreku propozon që institucionet të marrin pikë reference çështjen e Kushtetutës së vitit 1974, ngase sipas tij, ajo është baza mbi të cilën ka filluar të ndërtohet procesi i pavarësimit të Kosovës.

Qeveria e Kosovës i kishte propozuar BE-së që në kuadër të dialogut të Brukselit të diskutohet edhe për demarkacionin me Serbinë. Por, deri më tani nuk ka pasur vullnet nga pala tjetër.

Aktualisht, Kosova vazhdon ta ketë problem demarkimin e kufirit me Malin e Zi. Marrëveshja ishte arritur mes dy qeverive dhe është ratifikuar nga Mali i Zi, por jo dhe nga Kuvendi i Kosovës, për shkak të kundërshtimeve të ashpra të opozitës së kaluar.