Rektori i Universitetit të Prishtinës, Marjan Dema, ka folur rreth rrugëtimit të këtij institucioni të lartë arsimor, në këto 50 vjet që nga themelimi.

Ai ka thënë se Universiteti i Prishtinës, ishte vatër ku grumbullonte të gjithë të rinjtë e trevave shqiptare për t’u ushqyer me dije, ndërsa dhe kishte mision pasi ndërroi mentalitetin.

”Universitet i Prishtinës, ishte një vatër ku i grumbullonte të gjitha të rinjtë e të gjitha trevave etnike shqiptare, ku merrnin dritë të diturisë dhe njohurive, dhe atë dritë e bartnin nga të gjitha vendet nga vinin dhe ktheheshin”.

”Universiteti i Prishtinës i mbush 50 vjet por me përvojën që e ka lirisht mund thuhet se ka 500 vjet, sepse mbi supet e veta barti jo vetëm misionin që ishte ta transferojë njohurinë tek të rinjtë, përmes mësimdhënies, mësimnxënies, kishte edhe një mision tjetër, ta ndërrojë mentalitetin – të ndërrojë kuadro, të jetë konkurrent me të tjerat, t’i mbrojë të drejtat”.

”Studentët e Universitetit të Prishtinës, njihen për shumë inciativa që kanë marrë në funksion të ndryshimit të asaj gjendje që ndoshta me bindje të plotë e them se e ka arrit Universiteti i Prishtinës”.

Si mbijetoi Universiteti i Prishtinës?

”Më pas filluan sulmet, shkas ishin demonstratat, pakënaqësitë e studentëve të ‘81-shës. Shkaku ishte se Universiteti i Prishtinës pengonte. Universiteti i Prishtinës, ndryshoi mentalitetin, formën, përmbajtjen”.

”Sepse para universitetit ka pasur të tjera përceptime për shqiptarët: janë njerëz që kryejnë punë krahu, hamallë, sharraxhinjë, pastrojnë rrugët mirëpo pas themelimit të universitetit, ndryshon kjo situatë, dhe shqiptarët tashmë janë konkurrentë dhe madje në disa fusha tejkalojnë”.

”Universitetin e Prishtinës madje e quanin me epitete të tjera, që nuk ishte aspak e lehtë edhe për profesorët të bartnin dhe të kryenin funksionin e tyre për studentët”.

”Gjërat kryesore që i kanë thënë me gjithë studentët e universitetit, është krenari, mburrje, fjaltë më të mira”.

”Pasi u themelua Universiteti i Prishtinës, e dimë që gjithçka e fituam ishte me mund, djersë dhe gjak”.

Dema në Zonën B përmendi edhe ndikimin që pati atë kohë Universiteti i Prishtinës, përtej kufijve, duke theksuar në veçanti bashkëpunimin me Universitetin e Tiranës, njofton Klan Kosova.

”Universiteti i Prishtinës ka ndërkombëtarizuar çështjen, ka kaluar kufijtë – fillimisht ka kaluar kufijtë e Jugosllavisë. Bashkëpunimi Universiteti i Prishtinës, me universitetet tjera, në veçanti me atë të Tiranës, shumë student janë informuar për shkak të atyre kufijve të çeliktë që kanë ekzistuar prej profesorëve të Universitetit të Tiranës”.

”Universiteti i Prishtinës e ka mbajtur barrën e edukimit, barrën e kuadrove. Ka qenë tempull që ka dhënë më shumë sesa unë që mund të shpreh gjatë emisionit tuaj”.