Prokuroria Speciale e Kosovës (PSRK), ka reaguar rreth deklaratës së ministres së Drejtësisë, Albulena Haxhiu, e cila përmes një postimi në Facebook sot theksoi se rasti me tokën në lagjen “Veternik” të Prishtinës është mbyllur nga Prokuroria Speciale me një dokument të falsifikuar nga Beogradi.

Përmes një reagimi për media, kjo prokurori i ka quajtur të pavërteta deklaratat Ministres së Drejtësisë, duke shtuar se këtë rast asnjëherë nuk e ka pasur në punë kjo prokurori.

Madje, PSRK-ja i ka quajtur tendencioze këto deklarata të ministres Haxhiu, raporton Arbresh.info.

“Prokuroria Speciale e Republikës së Kosovës shpreh indinjatë të thellë ndaj qasjes së vazhdueshme joproduktive të Ministres së Drejtësisë, Albulena Haxhiu, ndaj Prokurorisë Speciale të Republikës së Kosovës. Prokuroria Speciale, demanton fuqishëm deklarimin e Ministres së Drejtësisë, Albulena Haxhiu, të bërë sot, duke u shprehur se “është e shqetësuar pasi Prokuroria Speciale ka mbyllur hetimet për rastin e pronës milionëshe në Veternik”.Prokuroria Speciale informon opinionin publik se rasti për të cilin është deklaruar ministrja në fjalë, nuk është hetuar dhe nuk ka qenë në punë asnjëherë në Prokurorinë Speciale, prandaj deklarimi i tillë i ministres Haxhiu, është i pavërtetë dhe tendencioz”, thuhet në reagim.

Sipas Prokurorisë Speciale, deklarimet e tilla të pavërteta, fatkeqësisht nga ministrja e drejtësisë, i konsideron të qëllimshme dhe tendencioze në drejtim të  saj dhe punës se suksesshme të udhëheqësit të saj, duke vlerësuar se këto deklarime të pasakta, përveç tjerash kanë për qëllim edhe dezinformimin e opinionit publik, pengimin në punë dhe dëmtimin e imazhit të kësaj prokurorie.

“Nisur nga fakti se nuk është hera e pare që ballafaqohemi me sulme të tilla dhe deklarata të pavërteta nga ministrja Haxhiu, Prokuroria Speciale, i bën thirrje ministres së drejtësisë dhe të gjithë personave tjerë që kanë synim pengimin e kësaj prokurorie në realizimin e mandatit të saj, që të përmbahen nga deklarime të tilla të pavërteta, tendencioze dhe qëllimkëqija”, thuhet tutje në reagim.

Për më tepër, Prokuroria Speciale përmes reagimit, siguron opinionin publik, se veprimet e tilla të ministres së drejtësisë dhe të kujtdo tjetër, në asnjë moment dhe rrethanë nuk do të ndikojnë që kjo prokurori ta ushtroj mandatin e saj në drejtim të luftimit të kriminalitetit dhe ndjekjen e kryesve të veprave penale, pavarësisht se kush janë ata./Arbresh.info/

LEXO EDHE

Haxhiu për Prokurorinë Speciale: Mbylli hetimet për pronën në “Veternik” me një dokument të falsifikuar nga Beogradi