Daka: Presidentja më kërkori dorëheqjen në këmbim të një falenderimi, arsyet e shkarkimit të paqëndrueshme

11:12 | 15 Qershor 2021
Përparim Bublaku

Ish-kryetarja e KQZ-së Valdete Daka ka thënë se shkarkimi i saj nga presidentja Vjosa Osmani ka qenë i padrejtë.

Ajo ka thënë se arsyet për shkarkimin e saj janë lehtë të rrëzueshme

Daka në konferencën për medie ka kujtuar edhe kërcënimet që i janë bërë asaj gjatë procesit të zgjedhjeve të 14 shkurtit dhe mos reagimin e Osmanti.

Presidentja nuk mori asnjëherë mori mundin për të reaguar. Arsyet janë të paqëndrueshme, argumentet e saj janë lehtësisht të rrëzueshme”, ka thënë Daka, raporton arbresh.info.

Ajo ka thënë se Osmani i kishte kërkuar dorëheqjen në këmbim të një falenderimi publik./arbresh.info/

Deklara e plotë:

Të dashur qytetarë të Republikës së Kosovës dhe ju përfaqësues të mediave;

Tashmë të gjithë e dini se dje me vendimin e saj, Presidentja e Kosovës, ka përmbushur kërcënimin dhe premtimin e dhënë gjatë fushatës së fundit zgjedhore për shkarkimin tim.

Dua t’iu bëj të ditur qysh në fillim se ky është një vendim jo kushtetues dhe i pa mbështetur në ligj.

Këtë e them duke u mbështetur në faktet se arsyetimi i dhënë në shkarkimin tim, jo vetëm që është i paligjshëm, kontradiktor me vetëveten, por edhe qesharak.

Të akuzohem për mospunë dhe për vendimet kolegjiale të cilat janë marrë nga të gjithë anëtarët e KQZ-së dhe të ndëshkohem vetëm pse kam aplikuar Kushtetutën dhe Ligjin është absurditet i llojit të vet dhe sipas të gjitha gjasave vendim i porositur.

Ky vendim i Presidentes, i bërë publik pasditen e së hënës, shihet qartë se ishte përgatitur më herët. Këtë e dëshmon edhe fakti për emërimin brenda pak minutave të kryetarit të ri të KQZ-së.

Publikimit të këtij vendimi i ka paraprirë edhe një takim në të cilin isha e ftuar nga Presidentja e Kosovës. Në këtë takim, ajo ka kërkuar që unë të ofrojë dorëheqjen në mënyrë të vullnetshme dhe në këmbim do të pranoja falënderime publike për punën e deritanishme si Kryetare e KQZ-së, si dhe më premtoi vazhdim të bashkëpunimit në të ardhmen.

Natyrisht se kjo ishte një gjuhë dhe sjellje e papranueshme për mua nga ana e Presidentes së Republikës së Kosovës. Asaj i kam thënë se kam përmbushur detyrën time me integritet të lartë profesional dhe në përputhje me Kushtetutën e Kosovës dhe ligjet në fuqi.

Të dashur qytetarë dhe ju përfaqësues të mediave,

Kërcënimet publike të Presidentes Osmani kanë nisur që nga janari i vitit 2021, në kohën kur unë si Kryetare dhe shumica e anëtarëve të KQZ-së, edhe përkundër presionit të madh, ishim në mbrojtje të Aktgjykimit të Gjykatës Kushtetuese për të mos lejuar kandidimin për deputetë të personave të shpallur fajtor për vepër penale, në tri vitet e fundit, me vendim përfundimtar të gjykatës. Vetëm një ditë pas vendimit të KQZ-së për moscertifikim të këtyre personave, më 23 janar, UD e Presidentes së Kosovës, përmes një video-mesazhi kishte kërcënuar publikisht me shkarkim anëtarët e KQZ-së. Ndonëse do të duhej të ishte në krye të detyrës për mbrojtje të kushtetutshmërisë dhe të inkurajonte KQZ-në për të zbatuar Kushtetutën dhe Ligjin, ajo po i kërkonte KQZ-së të mos respektonte Aktgjykimin e Gjykatës Kushtetuese.

Ky presion i porositur ka vazhduar më vonë edhe nga përfaqësuesit e një subjekti të caktuar politik, të cilët kanë pamundësuar zhvillimin normal të mbledhjeve, duke shkaktuar ndërprerje dhe duke bërë akuza të pabaza, e shpeshherë duke kaluar fyerje dhe ofendime, por që Presidentja nuk mori asnjëherë mundimin për të reaguar.

Për këtë, të gjithë jemi dëshmitarë meqenëse mbledhjet janë transmetuar në media të shumta. Shumë prej këtyre akuzave të tyre të pabaza mund t’i gjeni edhe në tekstin e vendimit të Presidentes për shkarkimin tim.

Në këtë vendim, Presidentja e Republikës ka renditur disa arsye për shkarkimin tim. Këto janë arsye të paqëndrueshme dhe nuk mbështen në realitet, i cili është krejtësisht i ndryshëm. Argumentet e dhëna nga Presidentja e Kosovës janë lehtësisht të rrëzueshme dhe nuk duhet mundim i madh për ta bërë këtë.

Së pari, Presidentja e Kosovës në vendimin e saj ka përmendur presionin tim ndaj stafit të KQZ-së në mbledhjen e mbajtur me 22 janar 2021, kur në rend dite ishte certifikimi i kandidatëve për deputetë.

Në këtë mbledhje, të cilën e ka parë e gjithë Kosova, është parë dështimi i përmbushjes së detyrave dhe obligimeve të Zyrës për Regjistrim të Partive Politike, respektivisht drejtorit të saj, i cili përkundër përgjigjeve të marra në rrugë zyrtare nga institucionet përgjegjëse, në këtë rast nga KGjK, se një numër i kandidatëve nuk përmbushë kushtet ligjore për të qenë kandidat, kishte rekomanduar certifikimin e të gjithë kandidatëve me arsyetimin se verifikimi i bërë ishte jo i plotë dhe i pasaktë. Me qëllim të saktësimit të informatës së ofruar nga KGjK-ja, takimi i KQZ-së ishte ndërprerë për të marrë një confirm zyrtar. KGjK-ja, brenda një ore i kishte kthyer përgjigje KQZ-së se të dhënat që i janë ofruar drejtorit të Zyrës për Regjistrim të Partive Politike janë plotësisht të sakta dhe të konfirmuara. Rruga ligjore e ndjekur nga unë dhe shumica e anëtarëve të KQZ-së është konfirmuar nga dy institucionet që kanë shqyrtuar ankesat e këtyre kandidatëve, nga PZAP-ja dhe Gjykata Supreme.

Rrjedhën e mëtejme të kësaj mbledhjeje, tashmë e dini të gjithë dhe i dini poashtu edhe ngjarjet që kanë ndodhur pas saj.

Të akuzohem vetëm unë, i bie që të gjitha vendimet e marra në KQZ janë marrë vetëm nga Valdete Daka dhe jo nga KQZ-ja si një organ kolegjial, i përbërë nga 11 anëtarë.

Sot, ne mund ta pyesim Presidenten se sipas kësaj logjike, a do të duhej të shkarkoheshin të gjithë anëtarët e KQZ-së për mosdëgjueshmëri dhe për vendimet e marra?

Së dyti, Presidentja e Republikës ka përdorur çështjen e verifikimit të aplikuesve nga jashtë vendit si arsye për vendimin e saj. Në vendimin e Presidentes, vendimi i KQZ-së vlerësohet si mohim i të drejtës për të votuar.

Zonja Presidente, kjo është një e pavërtetë e madhe. KQZ-ja, me vendimin për verifikimin e aplikuesve nuk i ka mohuar askujt të drejtën për t’u regjistruar si votues jashtë Kosovës dhe as për të votuar, sepse KQZ-ja i ka përfshirë në listën votuese edhe ata aplikues që nuk kishte arritur t’i kontaktonte përmes telefonit. Për më tepër, vendimi i KQZ-së nuk është marrë vetëm nga unë, por për të kanë votuar të gjithë anëtarët e KQZ-së.

Ky vendim ka qenë një masë shtesë për siguri të procesit zgjedhor dhe i mbështetur në vendimet e Panelit Zgjedhor për Ankesa dhe Parashtresa. Ky institucion, në vitin 2017 gjatë shqyrtimit të një rasti që kishte të bënte me raundin e dytë të zgjedhjeve për kryetar të komunës së Istogut, kishte kontaktuar 60 aplikues, 56 prej të cilëve nuk ishin lajmëruar, por vetëm sekretaria e operatorit se numri është i paqasshëm, ndërsa në emër të dy aplikuesve ishin lajmëruar dy gjerman folës. Kjo tregonte qartë për cenimin e procesit të regjistrimit të votuesve nga jashtë vendit. Edhe në rekomandimet e vëzhguesve të Bashkimit Evropian është kërkuar nga KQZ-ja të marrë masa shtesë për sigurimin e kredibilitetit të këtij procesi.

Së treti, Presidentja thotë se qytetarët që vendosën të ankoheshin, patën vetëm një ditë kohë dhe se ky afat ishte kufizim i të drejtës së qytetarëve për ushtrimin e mjeteve juridike në një afat të arsyeshëm.

Edhe kjo arsye e shpërfaq mosnjohjen e thellë të procesit zgjedhor nga Presidentja. Zgjedhjet e 14 shkurtit kanë qenë të parakohshme dhe në dekretin e nënshkruar nga vetë ajo, KQZ-ja udhëzohet për organizim të zgjedhjeve në përputhje me legjislacionin. Sa për informim të Presidentes, ky legjislacion e lejon KQZ-në të përcaktojë afatet kohore për të gjitha fazat e procesit zgjedhor në përputhje me ditët që janë në dispozicion të KQZ-së për organizimin e zgjedhjeve. Plani operacional, pra ku përfshihet edhe ky afat, është aprovuar nga të 11 anëtarët e KQZ-së dhe jo vetëm nga unë.

Së katërti, Presidentja e Kosovës përmend vendimin e KQZ-së për lejimin e votimit të qytetarëve duke përdorur dokumente me afat të skaduar.

Edhe kjo arsye është e paqëndrueshme dhe e pavërtetë, sepse unë personalisht kam qenë kundër këtij vendimi. Tetë anëtarë tjerë të KQZ-së e kanë mbështetur propozimin e z. Sami Kurteshi nga Lëvizja Vetëvendosje për të lejuar votimin e qytetarëve me dokumente me afat të skaduar. Votimi është zhvilluar përmes e-mailit dhe ekzistojnë fakte që e dëshmojnë se unë kam qenë kundër këtij vendimi, por Presidentja nuk ka pyetur asnjëherë për të vërtetën e vendimit të KQZ-së.

Së pesti, Presidentja kur flet për mbrotjen e të dhënave personale, arrin në përfundime që i takojnë vetëm institucineve të drejtësisë nëse është shkelur Ligji për Mbrojtjen e të Dhënave Personale. Presidentja, në asnjë rrethanë nuk mund ta luajë rolin e gjyqtares apo të ndonjë institucioni tjetër që merret me zbatimin e këtij ligji.

Të dashur qytetarë,

Ju deklaroj me përgjegjësinë më të madhe morale dhe profesionale se gjatë ushtrimit të funksionit si Kryetare KQZ-së, unë kam qenë e përgjegjshme dhe se kam vepruar me integritet të lartë e në përputhje me Kushtetutën e Kosovës dhe Ligjin për Zgjedhjet e Përgjithshme. Gjatë kësaj kohe, unë nuk i jam dorëzuar asnjëherë përballë presioneve, siç e kam dëshmuar edhe me rastin e fundit.

Gjatë detyrës sime si Kryetare e KQZ-së, jam angazhuar maksimalisht në avancimin e proceseve zgjedhore dhe së bashku ia kemi arritur. Sot, KQZ-ja është shembull për shumë shtete të Ballkanit për organizimin e zgjedhjeve të lira, demokratike dhe sipas standardeve ndërkombëtare.

Sot KQZ-ja është anëtare me të drejta të plota e Asociacionit të Zyrtarëve Zgjedhorë Botërorë (A-Ëeb). Po ashtu, KQZ-ja është anëtare me të drejta të plotë edhe e Asociacionit të Zyrtarëve Zgjedhorë Evropianë (ACEEEO) dhe e barabartë, ndoshta si në pak fusha, me trupat menaxhuese të zgjedhjeve të Rusisë dhe Serbisë.

Natyrisht se ky sukses nuk është personal, por sukses i një pune të përbashkët të dhjetëra anëtarëve dhe e stafit jashtëzakonisht profesional të KQZ-së. Ky është një moment i mirë për t’i falënderuar për punën e tyre dhe për t’i inkurajuar që të vazhdojnë të punojnë si gjithmonë me profesionalizëm e integritet.

Unë jam krenare që kemi punuar së bashku për kaq kohë dhe për sukseset e përbashkëta.

Gjatë 11 viteve të punës në KQZ, unë kam punuar me katër Presidentë dhe me shumë Kryeministra, si dhe me ndihmën e institucioneve kam organizuar me dhjetëra procese zgjedhore, por asnjëherë nuk ka pasur asnjë vërejtje dhe dyshime në integritetin tim profesional dhe personal. Përkundrazi, për punën time jam vlerësuar gjithmonë publikisht nga shumë institucione ndërkombëtare si dhe jam vlerësuar nga të gjitha misionet vëzhguese të zgjedhjeve.

Po ashtu, dua të shpreh falënderim për të gjithë mediat, gazetarët, shoqërinë civile, analistët, përfaqësues të subjekteve të ndryshme politike, për mbështetjen korrekte dhe profesionale gjatë përballjes me këtë situatë të paprecedentë.

Në fund të kësaj paraqitje, dua t’iu them se karriera ime profesionale është e lidhur ngushtë me betejat për drejtësi dhe kjo do të jetë vetëm një betejë e radhës. Unë jam përballur me sfida të ndryshme, por më besoni se kjo nuk është më e vështira.

Unë do të shoh të gjitha mundësitë për të kërkuar të drejtën time përmes rrugëve ligjore, e cila është shkelur me një vendim politik dhe në kundërshtim të plotë me Kushtetutën e Republikës së Kosovës dhe Ligjin për Zgjedhjet e Përgjithshme.

Shpërndaje në rrjete sociale

Lajmet më të lexuara

Të ngjashme

Foto lajm

“Prishtina e mbeturinave”, lagjet kundërmojnë deri në disa metra larg kontejnerëve

09:00 | 4 Gusht 2024

Djali iu bë polic, prindi përlotet nga emocionet: Rinia na ikën…Unë dy djem i kam jashtë, e ky kam pas qejf me vesh uniformën

16:28 | 2 Gusht 2024

Vogëlushja shpërthen në lot nga gëzimi i diplomimit të vëllait: Ka dhënë shumë për me arritë këtu

12:43 | 2 Gusht 2024

Kurti mori pjesë në shënimin e Ditës Kombëtare të Zvicrës: Me kalimin e kohës, lidhjet tona janë intensifikuar dhe janë zgjeruar

23:33 | 1 Gusht 2024

Zjarr fushor në Komoran

16:35 | 30 Korrik 2024

Policia e Kosovës identifikon një vend ku po kultivoheshin bimë narkotike në bjeshkën e Roshkodolit të Deçanit

18:27 | 29 Korrik 2024

Kalaja e Artanës, ish -Novobërdës, atraksioni turistik i mbetur peng nga dëmtimet

15:00 | 27 Korrik 2024

“Jam i pandashëm në këtë punë, deri në vdekje nuk largohem nga mjedra”/ Ky është llapjani që ka dy hektarë e 20 ari me mjedra

13:00 | 27 Korrik 2024

Bislimi priti në takim Përfaqësuesin Special të Norvegjisë për Ballkanin Perëndimor, e njofton me punën e Qeverisë

20:58 | 24 Korrik 2024

AUV gjen dhe refuzon për import një ngarkesë prej 26 ton mish të shkrirë me origjinë nga Brazili

19:01 | 23 Korrik 2024