Daçiq nxihet në rrenë, shtyn për të hënë publikimin e “tërheqjes së gjashtë të njohjes së Kosovës”

14:38 | 29 Qershor 2018
Arbresh.info

Beograd, 29 qershor – Ministri i Jashtëm i Serbisë, Ivica Daçiq kishte paralajmëruar se sot do ta bënte publik emrin edhe të një shteti, që do të tërhiqte njohjen e pavarësisë së Kosovës, por më vonë u tha gazetarëve se këtë do ta bëjë të hënën, më 2 korrik.

Siç raporton FoNet, ai në Ministrinë që e drejton ftoi gazetarët në konferencë të jashtëzakonshme, në të cilën ata prisnin të mësonin emrin e shtetit të gjashtë që tërhiqte njohjen për pavarësinë e Kosovës. Por ky u tha atyre se publikimin e emrit të vendit po e shtynte për të hënën, meqë “pres notën zyrtare nga ky shtet, e cila ende nuk ka mbërri”.

Sipas raportimit të medieve serbe, Daçiq i ka bërë thirrje Prishtinës dhe ministrit të Jashtëm, Behgjet Pacollit të tregojë letrat e vendeve që kanë njohur pavarësinë e Kosovës, 115, 116 vende, duke e cilësuar këtë “fatamorganë”.

Disa nga vendet për të cilat Daçiq ka thënë se kanë tërhequr njohjen e Kosovës, e kanë demantuar atë, ndër të fundit ishte Liberia.

Shpërndaje në rrjete sociale

Lajmet më të lexuara

Të ngjashme

Foto lajm