Edhe pse në takimin e së martës ndërmjet Lëvizjes Vetëvendosje dhe Lidhjes Demokratike të Kosovës ishin të pranishëm ambasadorët e QUINT-it dhe shefja e Zyrës së Bashkimit Evropian në Kosovë, Nataliya Apostolova takimi përfundoi pa ndonjë marrëveshje.

LDK nuk po heqë dorë nga kërkesa për kryeparlamentarin, zotimin për mbështetjen e kandidatit të LDK-së për president dhe pesë ministritë, ndërsa LVV thotë se pozita e kryeparlamentarit tashmë punë është punë e kryer.

Pas takimit të mbrëmshëm ndërmjet LDK-së dhe LVV nuk ka pasur ndonjë njoftim për takim sot, ndonëse kanë mbetur edhe shtatë ditë deri në skadimin e afatit kushtetues për koalicionin qeverisës.

Dështimin në arritjen e marrëveshjes e ka konfirmuar vetë kryetari i Lidhjes Demokratike të Kosovës, Isa Mustafa, duke lënë të hapur mundësinë për arritjen e marrëveshjes.

“Ne biseduam me Lëvizjen Vetëvendosje për mundësinë e një koalicioni qeverisës. Informuam edhe ambasadorët QUINT-it, sepse ata kishin për qëllim me ardhjen e tyre vetëm sa të informohen jo të ndërmjetësojnë dhe të ndikojnë në procesin e marrëveshjes. Si Lidhje Demokratikë e Kosovës ne jemi të bindur se zgjidhja që e kemi ofruar është një zgjidhje, e cila i kontribuon marrëveshjes qeverisëse, e cila balancon mbi suazat e votës së qytetarëve dhe besimin e qytetarëve që e kemi marrë ne zgjedhjet e 6 tetorit të vitit të kaluar dhe u shprehëm se mbesim të hapur nëse Lëvizja Vetëvendosje si parti e parë i pranon kushtet tona për bashkëqeverisje. Ne jemi të gatshëm për të bërë marrëveshje dhe konsiderojmë se do të jetë një marrëveshje e cila i kontribuon vendit, i kontribuon luftës kundër korrupsionit, i kontribuon zhvillimit ekonomik, dhe i jep përgjigje qytetarëve në besimin që e kemi marrë”, u shpreh Mustafa.

Lideri Lëvizjes Vetëvendosje, Albin Kurti pasi doli nga takimi me Lidhjen Demokratike të Kosovës, ku të pranishëm për më shumë se një orë ishin edhe ambasadorët e shteteve të QUINT-it, ka thënë para medieve se nuk do t’i ndalë përpjekjet për marrëveshje, por sipas tij, nuk mund të bëjnë marrëveshje nëse ka përafrim të njëanshëm.

Kurti u shpreh se në stilin “merre ose lëre”, ashtu siç po insiston, sipas tij LDK-ja, nuk mund të arrihet marrëveshja për koalicion.

Ndërkaq, partitë opozitare, saktësisht shefi i Grupit parlamentar të Partisë Demokratike të Kosovës, Bedri Hamza ka thënë të martën në një konferencë për media se vendi po paguan faturën për vonesën në krijimin e institucioneve.

Ndryshe, kanë mbetur edhe shtatë ditë deri në skadimin e afatit kushtetues për koalicionin qeverisës.