Ish-ambasadorja e Kosovës në Shtetet e Bashkuara të Amerikës, Vlora Çitaku e ka quajtur papërgjegjësi mos-emërimin e ambasadorëve të rinj nga ana e Kosovës.

Komentet nënkryetarja e PDK’së i ka bërë në T7.

“Fatkeqësisht jo vetëm në SHBA, ne jemi pa ambasador në Bruksel, në Londër tani e pothuajse tre vjet, jemi pa ambasador në Berlin. Në shumicën e misioneve diplomatike Ambasadat tona janë pa titullar”, tha Çitaku.

“Është për të ardhur keq që edhe pas shumë muajsh nuk kemi misione diplomatike funksionale. Nuk arrij ta kuptoj pse, meqenëse që të tre titullarët e institucioneve bartëse të politikës së jashtme vijnë nga e njëjta listë zgjedhore. Përderisa më herët mund të ketë pasur përplasje, mospajtime brenda bartësve të institucioneve, nuk besoj që tani është ky rast”, shtoi ajo.

“Më shumë e shoh një papërgjegjësi. Kjo puna e ambasadorëve nuk është sikur me ra bora në verë. Nuk ka ndodh papritur. Unë s’kam asnjë problem me shkarkimin e ambasadorëve të emëruar politikë, mirëpo këtu ka munguar hapi i dytë. Në momentin kur dërgohet dekreti për shkarkimin dekreti tjetër që duhet të dorëzohet menjëherë është kërkesa për udhëheqësin e ri”, theksoi Çitaku.