Anëtari i PDK’së, Lirak Çelaj është shprehur i pakënaqur me procesin e zgjedhjes së kryesisë së re të këtij subjekti.

Ai për T7 ka thënë se një pjesë e anëtarëve për shkak të pakënaqësive nuk kanë marrë pjesë në mbledhjen e Këshillit Drejtues të Partisë Demokratike të Kosovës, e një pjesë e tyre edhe kanë dhënë dorëheqje nga ky subjekt.

“Një pjesë për shkak të pakënaqësisë nuk kanë marrë pjesë fare në mbledhje të Këshillit Drejtues, pra pothuajse ishte në limit të kuorumit përbërja e Këshillit Drejtues, disa edhe dhan dorëheqje nga PDK, disa e lëshuan sallën në shenjë pakënaqësie. Diku 70-80 për qind të folësve prezent ishin të pakënaqur me këtë proces”, ka thënë ai.

Çelaj tutje ka thënë se ai ka votuar kundër kryesisë së re për shkak që PDK është dashur që të sillet në mënyrë demokratike, e përzgjedhja e kryesisë të mos bëhet vetëm nga kryetari i këtij subjekti.

Përndryshe, ai është shprehur se kjo gjë mund të ndikoj edhe në zgjedhjet lokale.

“Unë kam shprehur pakënaqësinë edhe në Këshillin Drejtues prandaj edhe kam votuar kundër kësaj kryesie sepse mendoj që një parti e cila edhe e ka emrin demokratike duhet të sillet edhe në mënyrë demokratike, dhe mendoj që në shekullin 21 nuk ka vend që një kryesi të emërohet e të sillemi para aktit të kryer, një përzgjedhje krye këput të një individi, në këtë rast e kryetarit. Kur u tha që do të shkojmë në zgjedhje të kryetarit dhe kryesisë në prag të zgjedhjeve lokale unë e pata kundërshtuar sepse e dija që do të shfaqeshin shumë pakënaqësi, ashtu si u shfaqën në Këshillin Drejtues dhe kam frik se kjo do të reflektojë pastaj në rezultatin e zgjedhjeve lokale, ndonëse kemi kandidat shumë të mirë”, ka shtuar ai.

Tutje ai ka thënë se zgjedhja e kryesisë së re ka qenë gabim strategjik i PDK’së.

“Është një gabim strategjik prandaj kisha kundërshtuar këtë proces para se të ndodhte. Unë kisha kërkuar gjithmonë reforma, por jo në njerëz, por të proceseve”, ka deklaruar ai.