Shefi i diplomacisë së Bashkimit Europian, Josep Borrell, ka lëshuar një deklaratë të gjatë publike në të cilën tregon më zgjeruar për vizitën e tij që pati në Maqedoninë e Veriut, Shqipëri dhe Bosnje-Hercegovinën.

Borrell vë në theks të veçantë dënimin e pushtimit rus të Ukrainës, nga ana e udhëheqësve të shteteve të cilat ai vizitoi javën që e lëmë pas.

”Udhëheqësit e tyre ishin të qartë në dënimin e pushtimit rus të Ukrainës dhe të tre vendet i janë bashkuar sanksioneve tona kundër Rusisë. Ne jemi të bashkuar në përpjekjet tona për të ndalur luftën dhe për të ndihmuar popullin ukrainas. Theksova me vendosmëri angazhimin e BE-së për të mbështetur edhe më shumë Ballkanin Perëndimor dhe për të çuar përpara të ardhmen e rajonit në Bashkimin Evropian”.

Mes tjerash në këtë qëndrim, ai pranon se lufta në Ukrainë ka sjellur kujtime të gjalla të luftërave rreth shpërbërjes së ish-Jugosllavisë në vitet 1990 dhe fillimin e viteve 2000.

Ai përmend ringjalljen shqetësuese të tensioneve specifikisht midis Prishtinës dhe Beogradit zyrtar, që sipas tij kishte ndodhur edhe para konfliktit mes Rusisë dhe Ukrainës.

”Një ringjallje shqetësuese e tensioneve në rajon

Por edhe para luftës në Ukrainë, pati një ringritje shqetësuese të tensioneve në rajon, veçanërisht brenda Bosnjë-Hercegovinës dhe midis Serbisë dhe Kosovës”.

”Ne kemi parë ndërhyrje nga jashtë që synojnë të destabilizojnë fqinjët tanë dhe të dobësojnë Bashkimin Evropian, veçanërisht përmes fushatave tinëzare dhe të mirë-dokumentuara të dezinformimit të Rusisë”.

”Vështirësitë e pandemisë COVID-19 në të gjithë Evropën janë shfrytëzuar, por këto fushata janë rritur më tej ndjeshëm që nga fillimi i luftës kundër Ukrainës. Frika nga rritja e çmimeve të energjisë dhe ushqimeve si rezultat i luftës në Ukrainë është gjithashtu shumë e fortë në Ballkanin Perëndimor, vende që janë shumë më të varfra se ato në BE”.

Ai thotë se kjo çështje u shfaq qartë në diskutimet e tij me autoritetet dhe shoqërinë civile në këto vizita që realizoi.