Në vitin 2006 Kuvendi i komunës së Mitrovicës kishte marrë vendim që t’iu ndajë trembëdhjetë (13) banesa kuadrove profesionale të institucioneve të komunës. Më 1 nëntor 2006 komuna kishte lidhur kontratë mbi Qiranë për periudhën dhjetë (10) vjeçare, e cila ka skaduar në fund të vitit 2016, por që shfrytëzuesit akoma nuk i kanë liruar banesat e komunës.

Portali Veriu.info ka siguruar vendimet e nënshkruara nga kryetari i komunës Komuna e Mitrovicës, Agim Bahtiri, ku më 18 prill 2018 ku ka marrë vendim me të cilin i ka obliguar shfrytëzuesit aktual të banesave, që në afat prej gjashtëdhjetë (60) ditësh t’i lirojnë banesat.

Në vendim bëhet e ditur se lirimi i banesave është i domosdoshëm, pasi që komuna e Mitrovicës do t’i inicioj procedurat në bazë të Ligjit për Financimin e Programeve të Veçanta të banimit, ku këto banesa do të ju jepen në shfrytëzim familjeve apo individëve të cilët nuk janë në gjendje ekonomike t’i përballojnë ofertat e tregut të lirë të banesave.

Komuna bënë të ditur se ky ligj nuk ka paraparë dhënien e banesave për kuadro profesionale, prandaj këto banesa do t’u jepen në shfrytëzim skamnorëve.

Veriu.info mëson se me rastin e vizitave që zyrtarët komunal u ka bërë këtyre banesave, ku edhe u është dorëzuar vendimin për lirimin e tyre, vetëm tri (3) nga trembëdhjetë (13) kanë qenë duke u shfrytëzuar për banim, për shkak se të tjerët edhe pse i kanë mbajtur banesat, kanë pasur banim të përhershëm në vende tjera.

Në mesin e përfituesve të banesave të komunës, por që tash do t’i merret, është edhe kryetari i Gjykatës Supreme të Kosovës, Enver Peci.

Po ashtu shihet se përfitues të banesave që duhet ta lirojnë, janë edhe gjeneralmajori i FSK-së, Zymer Halimi dhe drejtor i Autoritetit Rregullator për Shërbimin e Ujit, Raif Preteni.

Kjo është lista e përfituesve:

Sami Rama

Enver Peci

Zymer Halimi

Sylë Hajdini

Xhevat Veseli

Qerim Hamiti

Arsim Krasniqi

Fadil Selmanaj

Sadije Asllani Bilalli

Adem Kërleshi

Isa Hyseni

Raif Preteni

Flamur Gacaferri