Policia e Kosovës përmes një aksioni të zhvilluar në rajonin e Gjilanit dhe të Kamenicës, kanë arrestuar katër persona.

Policia e Kosovës për arbresh.info ka bërë të ditur se tre personat e arrestuar janë persona zyrtarë, ndërsa i katërti është pronar i një kompanie.

Katër personat janë të dyshuar për veprat penale si: Keqpërdorim i Pozitës zyrtare dhe Keqpërdorim dhe mashtrim në Prokurim Publik.

Lajmin për arbresh.info e ka konfirmuar zëdhënësi  i Policisë së Kosovës, Daut Hoxha.

“Mund të ju konfirmoj se 4 persona janë arrestuar sot ne rajonin e Gjilanit, në Kamenicë, nga Policia e Kosovës, nën dyshimin për vepra penale: Keqpërdorim i Pozitës zyrtare dhe Keqpërdorim dhe Mashtrim në Prokurim Publik, ndërsa për detaje tjera do të njoftoheni përmes komunikatës për media”, ka thënë Hoxha.

Ndërsa në komunikatën e lëshuar nga zyra  për media e Policisë së Kosovës mësohet shuma të mëdha parash, ku dyshohen se kanë mashtruar me një procedurë tenderuese për një tender me vlerë mbi 55 mijë euro.

Komunikata e plotë:

“Policia e Kosovës, Drejtoria për Hetimin e Krimeve Ekonomike dhe Korrupsionit, konkretisht Njësia Rajonale për Hetimin e Krimeve Ekonomike e Korrupsionit në Gjilan, ka zhvilluar hetime lidhur me një tender furnizimi për shkolla në Kamenicë, ku të dyshuar ishin komisioni vlerësues i Komunës dhe pronari i një kompanie, të cilët dyshohej se kanë mashtruar me një procedurë tenderuese për një tender me vlerë prej mbi 35 mijë euro” – shkruhet në komunikatë, përcjell arbresh.info.

Gjatë hetimeve janë siguruar dëshmi relevante se komisioni prej tre (3) anëtareve kanë nënshkruar raportin e pranimit të mallit, pa ardhur malli, duke dëmtuar buxhetin e komunës, e duke i mundësuar operatorit ekonomik përfitim të kundërligjshëm për shumën e lartcekur.

Me këto veprime të dyshuarit me iniciale P.J., I.Z. dhe F.D, dyshohet se kanë kryer veprën penale ,”Keqpërdorim i Pozitës apo autoritetit zyrtare”, ndërsa i dyshuari me iniciale A.K, pronar i kompanisë dyshohet se ka përfituar në mënyrë të kundërligjshme në vlerë mbi 35 mijë €uro, për tenderin në fjalë, pasi që i njëjti nuk i është përmbajtur kontratës dhe deri tani nuk ka bërë furnizimin me mall, me çka dyshohet se ka kryer veprën penale “Keqpërdorimi dhe Mashtrimi në Prokurim Publik”.

“Sot në cilësinë e të dyshuarave janë  intervistuar pronari i  kompanisë dhe tre anëtaret e komisionit të përmendur më lartë me iniciale, në prezencën e avokateve sipas detyrës zyrtare dhe pas përfundimit të intervistave katër të dyshuarit, me Aktvendim të prokurorit të shtetit janë  ndaluar për 48 orë për proceduar të mëtejme.” /arbresh.info/