Policia e rajonit të Prishtinës ka realizuar disa kontrolle të mërkurën në rrugën “Zahir Pajaziti” në Podujevë.

Në këtë rast, është ndaluar një person për kontrolle dhe tek i njëjti është gjetur dhe sekuestruar një armë dhe sasi e substancave narkotike 48 qese me rreth 100 gram, përcjell Arbresh.info.

“Pjesë e aksionit ka qenë kontrolli i vendbanimit të të dyshuarit dhe objekteve përcjellëse, në rrugën “Fitorja” në Podujevë ku janë gjetë dhe sekuestruar: një pushkë gjuetie, dy pistoleta (TT,Bereta), pesë karikatorë, municion, para të gatshme rreth 1000 Euro, një mjet i prehtë-thikë, tre telefona etj”, thuhet në njoftimin e policisë.

Lidhur me rastet janë arrestuar dy persona të dyshuar:

Ndaj të dyshuarit F. F, mashkull, shtetas i Republikës së Kosovës, është iniciuar hetim në drejtim të veprës penale posedim i paautorizuar i substancave narkotike, psikotrope ose analoge.

Me aktvendim mbi ndalimin e personit të dyshuar të nxjerrë nga ana e prokurorit të shtetit, i dyshuari është dërguar në qendrën e mbajtjes prej 48 orësh.

Ndërsa ndaj të dyshuarit B.F, mashkull, shtetas i Republikës së Kosovës është iniciuar rast për armëmbajtje pa leje./Arbresh.info