Prokuroria Themelore në Gjilan ka dhënë detaje rreth aksidentit zingjiror që ndodhi sot rreth orës 13:20, raporton arbresh.info.

Sipas njoftimit të prokurorisë në këtë aksident janë përfshirë 10 automjete, ku si pasoj një person ka ndërruar jetë dhe 16 të tjerë janë lënduar.

“Në Gjilan, sot, rreth orës 13:20 minuta, ka ndodhur një aksident i rëndë komunikacioni, i cili dyshohet se ka ndodhur për shkak të problemeve teknike të një kamioni transportues. Nga ky aksident i komunikacionit, janë përfshirë mbi 10 automjete, ku përpos dëmeve të mëdha materiale, një person ka ndërruar jetë, ndërsa 16 të tjerë kanë pësuar lëndime trupore, për të cilat kanë kërkuar ndihmë mjekësore në Spitalin Regjional në Gjilan, si dhe dy nga të lënduarit janë transferuar në QKUK, në Prishtinë”, bën të ditur prokuroria.

Sipas njoftimit, prokurori kujdestar, në Prokurorinë Themelore në Gjilan, menjëherë ka dalë në vendin e ngjarjes dhe ka urdhëruar policinë që drejtuesi i automjetit transportues, tani i dyshuari M.A., nga Peja, të ndalohet për 48 orë./Arbresh.info