Kandidati i LDK-së për kryeministër, Lumir Abdixhiku në kuvendin e 11-të zgjedhor të Partisë Shqiptare Demokristiane të Kosovës, dha premtimin se si do jetë Kosova me të në krye.

Sipas tij, Kosova me të në krye, do të anëtarësohet në NATO, BE dhe do të jetë gjithmonë krah Shteteve të Bashkuara të Amerikës.

Këto, Abdixhiku i tha pasi listoi të “bëmat” e Qeverisë Kurti.

“Republika e Kosovës sot udhëhiqet nga mosbesues së saj, nga një qeveri e paaftë dhe populiste, çmimi i së cilës është i papërballueshëm për të gjithë qytetarët pa përjashtim, por mbi të gjitha i rrezikshëm për fondamentet e ndërtuara nga dy subjektet tona politike përgjatë historisë 35-vjeçare. Përplasja me aleatët tanë thelbësorë, me ata që bënë dhe lirinë, dhe demokracinë dhe pavarësinë bashkë me ne, për secilin të djathtë, e secilin patriot në Kosovë. Kosova është në një krizë të thellë ekonomike”, tha Abdixhiku.

“Këtë gjendje ne të djathtit s’mund ta pranojmë, ne të djathtit e republikës s’duhet ta pranojmë. Prandaj prezenca jonë është jetike, e domosdoshme, prandaj zgjedhjet e ardhshme duhet t’i merrni si jetike. LDK-ja dhe PShDK-ja kanë edhe potencial politik, edhe njerëzor, edhe profesional, por mbi të gjitha kanë vullnet dhe dije që postulatin e djathtë, identitar të Republikës së Kosovës, një Kosovë shtet i pavarur e sovran, i anëtarësuar në NATO e Bashkim Evropian, njohësi e përhershme me ShBA-në, ta mbajmë postulat të tashmes dhe të ardhmes pa asnjë kompromis. Për këtë qëndrojmë ne, për këtë qëndrojmë bashkërisht”, tha i pari i LDK-së, njofton klankosova.tv.

Po ashtu, Abdixhiku përmendi raportet e mirëfillta të LDK-së me PShDK-në, dhe se si kjo e djathë i duhet Kosovës.

“Raportet e mirëfillta mes LDK-së dhe PShDK-së kanë nisur qysh në fillim me presidentin historik, Dr.Ibrahim Rugova, dhe si të tilla ato paraqesin vizionin e qartë për një republikë të pavarur e demokratike , gjithashtu të qartë për rëndësinë e dialogut dhe bashkëpunimit ndërmjet forcave politike të djathta të asaj kohe e të tashme, që besojnë në unitetin e brendshëm dhe bashkëpunimin e gjithanshëm në Kosovë”, shtoi tutje Abdixhiku.

“Ky bashkëpunim do të vazhdojë edhe sot, dhe ky bashkëpunim i joni nuk është i domosdoshëm vetëm për subjektet tona politike, por të mbeteni të sigurt është i rëndësishëm për jetën vitale të Republikës së Kosovës, e djathta duhet të bashkohet, nën një kulm, nën një shtëpi, në shtëpinë e madhe të djathë të demokracisë, LDK-në dhe PShDK-në për të udhëhequr Kosovën në adresën e vet origjinale euroatlantike. Sot duhet të ndërtojmë një Kosovë euroatlantike, sot në këtë periudhë sfidash është e domosdoshme të vazhdojmë të ruajmë dhe përçojmë vlera, le të angazhohemi për një bashkëpunim që duhet ta shpie vendin përpara”, tha kandidati për kryeministër.