Lumir Abdixhiku, kandidat për deputet nga koalicioni Lidhja Demokratike  e Kosovës (LDK), Aleanca Kosova e Re (AKR), Alternativa dhe Lëvizja për  Drejtësi, ka thënë të enjten në një konferencë me gazetarë, se  Presidenti Hashim Thaçi, ish-kryetar i PDK-së, është përfshirë  drejtpërdrejt në fushatë zgjedhore dhe në këtë mënyrë po bën shkelje të  rëndë të Kushtetutës.

“Në fillim të kësaj fushate nuk jemi të kënaqur me rolin që ka marrë  Presidenti i Republikës Hashim Thaçi, ish kryetar i PDK-së. Përfshirja e  tij haptazi nëpër fushatë zgjedhore, nëpërmes organizimit të takimeve,  drekave e darkave, tubimet me qytetarë dhe nëpunës publikë, përveç që  paraqet shkelje të rëndë të rolit të tij kushtetues, shpërfaq edhe një  rast të paprecedent në proces zgjedhor nga dikush që është i presupozuar  të mbajë rol uniteti në vend”, ka thënë Abdixhiku, transmeton arbresh.info.

Ai ka shtuar se Thaçi në këto tubime provon t’i bëjë favore partisë së  tij. “Po e ftojmë institucionin e Presidentit që të mos bëhet instrument  i politikës ditore partiake. Ky synim i tij i dëmton standardet  demokratike që Kosova ka vendos për ditët zgjedhore, rrezikon standardet  që LDK dhe partnerët e koalicionit synojnë t’i arrijnë në këto zgjedhje.

Kosova ka nevojë për një lidership që respekton ligjet dhe Kushtetutën”,  ka thënë ai.

Kandidati tjetër i koalicionit për deputetë, Ilir Deda ka thënë se  pavarësisht përfshirjes së Thaçit në fushatë, ai nuk mund ta shpëtojë  koalicionin PDK-AAK-Nisma, nga humbja e zgjedhjeve më 11 qershor.

“Kjo përfshirje e Thaçit nuk do ta ndihmojë koalicionin PDK-AAK-Nisma që  të dalë fituese në zgjedhjet e 11 qershorit. Përkundrazi vullneti  qytetar është për ndryshimin e madh që vjen nga koalicioni ynë”, ka  thënë Deda.

Abdixhiku dhe Deda i kanë ftuar gjithë elektoratin e partive në  koalicion dhe qytetarët e tjerë që të bashkohen në fillimin e fushatës, që organizohet sonte (e enjte) nga ora 17:00 në Pallatin e Rinisë në  Prishtinë./Arbresh.info.