Kryeministri i Republikës së Kosovës, Albin Kurti, së bashku me zëvendëskryeministren e tretë për Çështje të Pakicave dhe të Drejtat e Njeriut, Emilija Rexhepi, ministrin për Komunitete dhe Kthim, Nenad Rashiq dhe ministrin e Administrimit të Pushtetit Lokal, Elbert Krasniqi, mirëpriti në takim zyrtarë komunalë për komunitetet, të cilët vinin nga 15 komuna, nga jugu dhe veriu i vendit.

Zyrtarët vetë i përkasin komuniteteve boshnjake, egjiptiane, serbe, shqiptare dhe turke.

Në fjalën e tij, kryeministri Kurti trajtoi disa prej arritjeve kryesore për integrimin dhe mirëqenien e qytetarëve prej komuniteteve joshumicë.

“Ai përmendi krijimin e Komisionit për Verifikimin e Diplomave, lansimin e nismës për punësim të qytetarëve në veriun e Kosovës duke subvencionuar 70% të pagës për punonjësit e rinj për 6 muaj dhe zbatimin e rregullores së krijuar vitin e kaluar që ofron bazë ligjore për herë të parë në historinë e Republikës së Kosovës për shpalljen e konkurseve për vendet e punës në institucione vetëm për anëtarët e komuniteteve joshumicë.”, thuhet në njoftim.

Kryeministri nënvizoi edhe iniciativën për praktikë me pagesë “Kosovo Generation Unlimited” ku 16% të vendeve të punës praktike deri tash janë arritur për të rinjtë nga komunitetet joshumicë.

“Trajtoi gjithashtu edhe fillimin e procesit për pilotimin e skemës së re sociale, dhënien e granteve përmes ministrisë së Arsimit këtë vit me një rritje deri në një çerek milion euro për 9 qendra mësimore ku mësojnë fëmijët romë, ashkali dhe egjiptianë, dhe punën e Grupit Punues Ndërinstitucional për Raportimin dhe Parandalimin e Martesave të Hershme në mbrojtjen e qindra vajzave çdo vit, të cilave ju është rrezikuar shëndeti, arsimimi dhe mundësitë për punësim, prej martesave nën moshën 18 vjeç.”, thuhet tutje në njoftim.

Kurti shtoi se me mbështetjen për të gjitha shkollat në Kosovë, dhe me masat afirmative siç janë fillimi i verifikimit të diplomave të shkollave të mesme që japin mësim në gjuhën serbe, ne kemi dëshmuar që jemi për zhvillimin e arsimit për të gjithë fëmijët në Kosovë e nga të gjitha komunitetet.

Ai tha se e ardhmja jonë e përbashkët varet prej aftësive të të rinjëve e cila sigurohet përmes arsimimit për të gjithë.

“Shprehu se tashmë ka punë e arritje konkrete por bashkë mund të arrijmë edhe më shumë suksese për mirëqenien e qytetarëve të komuniteteve joshumicë në Kosovë.”, njofton ZKM.

Në bashkëbisedimin e zhvilluar, përveç iniciativave për rritjen e punësimit te anëtarët e komuniteteve joshumicë, u trajtuan dhe tema që ndërlidhen me buxhetet për komunitetet në nivel komunal si dhe ministror./Arbresh.info/