Nënkryetari i Lidhjes Demokratike të Kosovës (LDK), Lutfi Haziri, ka komentuar zhvillimet e fundit politike në botë dhe vend.

Me anë të një postimi në Facebook, ai përmendi edhe sulmin Iranian ndaj Izraelit duke thënë se përbën një situatë të re dhe gjendje lufte, shkruan Arbresh.info.

“Sulmi i Iranit ndaj Izraelit përbën një situatë të re dhe gjendje lufte. Marrëdhëniet Kinë e Korea e Veriut po avancohen. Po ndërtohet boshti i të keqes. Lufta në Ukrainë me krejt tragjedinë e saj po vazhdon. Duhet të dënohet por të shihet sa keq po ndikon në Ballkan dhe për ne”, ka shkruar Haziri.

Më tej ai ka thënë se duhet t’i gëzohemi faktit që rol në dialog pos treshes së BE-së ka marrë edhe kryeministri i Shqipërisë, Edi Rama.

“Tashmë formati i dialogut në Ballkanin Perëndimor, ku prioriteti i parë është Kosova dhe Serbia, nuk është vetëm nën kujdesin e treshes së BE-së Scholc-Macron-Meloni, por edhe kryeministri Rama nga regjioni ynë ka marr rol kritik. Kjo ka rëndësi të madhe dhe duhet t’i gëzohemi”, shtoi ai.

Ndër të tjera, Haziri ka shprehur shqetësimin e tij për mungesën e një takimit Kurti – Macron në formatin që i pari i Elizesë u takua me Vuçiqin.

“Problemi mbetet që takimi i Presidentit Macron me homologun serb ka ndodhur dhe për herë të parë nuk kemi takim të kryeministrit Kurti në këtë format”.

“Roli i SHBA-së dhe aleateve është demostruar me forcë para 25 vitesh. Luften e kemi fituar por sot paqen e kemi rrezikuar vetë ne. Ata që kanë harruar këtë, le ta shohin një pjesë të saj sot se çka do të thotë miqësi e përhershme me SHBA-të, të cilët e mbrojnë aleatin në çdo kohë dhe me krejt kapacatetet. Koha me pa drejt e krejt çka po ndodhë me Republikën tonë!”, përfundoi Haziri./Arbresh.info/